जनतापत्र, सिन्धुपाल्चोक । जिल्लाको विकास, संगठनात्मक एकता र समाजसेवाको भावनालाई प्राथमिकतामा राख्दै भूपेन्द्र थापाले नेपाली कांग्रेसको १५औँ महाधिवेशनअन्तर्गत सिन्धुपाल्चोक क्षेत्र नम्बर २ को क्षेत्रीय सभापति पदमा उम्मेदवारी प्रस्तुत गरेका छन्।
थापाले आफूले पार्टीको जिम्मेवारीलाई केवल राजनीतिक पदका रूपमा नभई समाज र जिल्लाको हितमा काम गर्ने माध्यमका रूपमा लिएको बताएका छन्। उनका अनुसार राजनीतिक दलहरू विकास र सामाजिक रूपान्तरणका लागि प्रभावकारी माध्यम बन्न सक्छन्। त्यसैले दलभित्रको आन्तरिक एकतालाई मजबुत बनाउँदै त्यसको प्रभाव समाज र विकास निर्माणमा देखिनुपर्ने उनको धारणा छ।
उनको मुख्य जोड पार्टीगत सीमाभन्दा माथि उठेर सिन्धुपाल्चोकको समग्र विकासमा केन्द्रित हुने संगठन निर्माणमा छ। जिल्लाको आर्थिक, सामाजिक तथा भौतिक विकासका लागि राजनीतिक संगठनलाई जनताको आवश्यकता र अपेक्षासँग जोडेर अघि बढाउनुपर्ने थापाको भनाइ छ।

थापा लामो समयदेखि सामाजिक गतिविधिमा सक्रिय रहँदै आएका व्यक्ति हुन्। जिल्लामा विभिन्न सामाजिक संस्था, संघ–संस्था तथा समस्यामा परेका व्यक्तिलाई व्यक्तिगत रूपमा सहयोग गर्दै आएको उनको परिचय छ। दुःखी, विपन्न तथा असहाय नागरिकलाई आवश्यक सहयोग उपलब्ध गराउनेदेखि विभिन्न सामाजिक गतिविधिमा साथ दिँदै आएको उनी निकट स्रोतको भनाइ छ।
यही सामाजिक अनुभवलाई अब राजनीतिक संगठनमार्फत थप व्यवस्थित र संस्थागत ढंगले अघि बढाउने उद्देश्यका साथ आफूले उम्मेदवारी दिने निर्णय गरेको थापाले बताएका छन्। उनका अनुसार कांग्रेसलाई केवल निर्वाचनका समयमा सक्रिय हुने राजनीतिक संरचनाका रूपमा नभई जनताको सुख–दुःखमा निरन्तर जोडिने सामाजिक र जनमुखी संगठनका रूपमा विकास गर्न आवश्यक छ।
थापाले आफ्नो उम्मेदवारीसँगै संगठनभित्र देखिँदै आएका गुट तथा उपगुटको प्रवृत्तिभन्दा माथि उठेर काम गर्ने प्रतिबद्धता व्यक्त गरेका छन्। उनले सबै कांग्रेसजनलाई समान रूपमा समेट्ने, विधि र पद्धतिमा आधारित संगठन निर्माण गर्ने तथा पार्टीका निर्णयलाई प्रभावकारी रूपमा कार्यान्वयन गर्ने विषयलाई प्राथमिकतामा राखेका छन्।
उनको राजनीतिक दृष्टिकोणमा व्यक्ति केन्द्रित गतिविधिभन्दा संस्था, नीति, विधि र पद्धतिलाई बलियो बनाउनु आवश्यक छ। संगठन बलियो भएमा मात्रै पार्टीले जनताको विश्वास कायम राख्न सक्ने र समाजमा प्रभावकारी भूमिका निर्वाह गर्न सक्ने उनको बुझाइ छ।
थापाले संगठन विस्तारका क्रममा नयाँ पुस्ता, अनुभवी नेता–कार्यकर्ता तथा विभिन्न तहमा रहेका कांग्रेसजनबीच सहकार्य र समन्वयलाई प्राथमिकता दिने बताएका छन्। पार्टीभित्र फरक विचार र धारणा हुनु स्वाभाविक भए पनि त्यसलाई संगठनको हितमा प्रयोग गर्नुपर्ने उनको भनाइ छ।
उनले सिर्जनात्मक र रचनात्मक सोचका साथ संगठनलाई अगाडि बढाउने योजना अघि सारेका छन्। पार्टी नेतृत्वले तय गरेका नीति, निर्णय तथा विधि–पद्धतिको स्थानीय तहसम्म प्रभावकारी कार्यान्वयन गर्न आफू प्रतिबद्ध रहने उनले बताएका छन्। संगठनलाई व्यवस्थित, अनुशासित र जनतामाझ उत्तरदायी बनाउन आवश्यक पहल गर्ने उनको भनाइ छ।
थापा सैनिक सेवाबाट अवकाश लिएपछि राजनीति तथा समाजसेवामा सक्रिय भएका हुन्। उनी नेपाल भूतपूर्व सैनिक संघका केन्द्रीय कोषाध्यक्षका रूपमा समेत जिम्मेवारीमा छन्। त्यसैगरी नेपाली कांग्रेस सिन्धुपाल्चोक क्षेत्र नम्बर २ प्रदेशसभा ‘क’ का कोषाध्यक्षको जिम्मेवारीमा रहेर पनि उनले संगठनात्मक गतिविधिमा काम गर्दै आएका छन्।

सैनिक सेवाको अनुभवसँगै व्यवसाय र सामाजिक क्षेत्रमा समेत सक्रिय रहेका थापाले जिल्लाबाहिर पनि व्यवसायिक पहिचान बनाएका छन्। संगठन व्यवस्थापन, अनुशासन र जिम्मेवारीलाई महत्व दिने आफ्नो अनुभवलाई पार्टी संगठनमा प्रयोग गर्ने उनको भनाइ छ।
थापाले नेपाली कांग्रेसलाई थप व्यवस्थित, बलियो र जनतामाझ भरोसायोग्य बनाउन संगठन सुदृढीकरण आवश्यक रहेको बताएका छन्। उनका अनुसार पार्टीको वास्तविक शक्ति नेता वा पदमा मात्र नभई तल्लो तहसम्म सक्रिय रहेका कार्यकर्ता र जनतासँगको सम्बन्धमा निर्भर हुन्छ। त्यसैले कार्यकर्ताको सम्मान, सहभागिता र भूमिकालाई प्रभावकारी बनाउने विषयलाई प्राथमिकता दिनुपर्ने उनको धारणा छ।
क्षेत्रीय अधिवेशनलाई लिएर पनि थापाले आफ्नो धारणा सार्वजनिक गरेका छन्। अधिवेशन आन्तरिक लोकतान्त्रिक अभ्यास भएकाले प्रतिस्पर्धालाई स्वाभाविक रूपमा स्वीकार गर्दै सबै पक्षको सम्मान गर्नुपर्ने उनले बताएका छन्। प्रतिस्पर्धाका क्रममा व्यक्तिगत आरोप–प्रत्यारोपभन्दा नीति, विचार र संगठन निर्माणका विषयमा केन्द्रित हुनुपर्ने उनको जोड छ।
उनले क्षेत्रीय अधिवेशनलाई सभ्य, भव्य, मर्यादित र एकताको सन्देश दिने कार्यक्रमका रूपमा सम्पन्न गर्न सबै पक्षसँग सहकार्य गर्ने बताएका छन्। निर्वाचनको परिणामभन्दा पनि अधिवेशनपछि कांग्रेस संगठन थप एकताबद्ध र सक्रिय बन्नुपर्ने उनको धारणा छ।
थापाले आफूलाई सहयोग गर्ने र समर्थन गर्ने सबैप्रति सम्मान व्यक्त गर्दै पार्टीभित्रको आन्तरिक प्रतिस्पर्धालाई लोकतान्त्रिक प्रक्रियाका रूपमा ग्रहण गर्न आग्रह गरेका छन्। उनले क्षेत्रका सम्पूर्ण कांग्रेसजनको साथ, सहयोग र विश्वासका आधारमा संगठनलाई थप गतिशील बनाउने प्रतिबद्धता व्यक्त गरेका छन्।
समृद्ध सिन्धुपाल्चोक निर्माणका लागि राजनीतिक संगठनलाई विकास, सामाजिक सेवा र जनताको आवश्यकतासँग जोडेर अघि बढाउनुपर्ने थापाको प्राथमिकता देखिन्छ। जिल्लाको विकासमा सबै पक्षको सहकार्य आवश्यक रहेको उल्लेख गर्दै उनले पार्टीगत सीमाभन्दा माथि उठेर जिल्लाको हितमा काम गर्ने वातावरण निर्माण गर्न आफूले भूमिका खेल्ने बताएका छन्।
क्षेत्रीय सभापति पदका लागि प्रस्तुत गरिएको उनको उम्मेदवारीसँगै संगठन सुदृढीकरण, आन्तरिक एकता, विधि–पद्धतिको पालना र सामाजिक उत्तरदायित्वलाई मुख्य विषयका रूपमा अघि सारिएको छ। अब क्षेत्र नम्बर २ को अधिवेशनले नेतृत्व चयनसँगै संगठनलाई आगामी दिनमा कुन दिशामा अघि बढाउने भन्ने विषयमा समेत निर्णय गर्नेछ।