काठमाडौं — भोटेकोशी बाढी आएको ११ दिनपछि नुवाकोटको बेत्रावतीबाट जीवित उद्धार गरिएकी ६४ वर्षीया महिलालाई उपचारका लागि काठमाडौं ल्याइएको छ।

विदुर नगरपालिका–१० की चण्डिका श्रेष्ठलाई बेत्रावती बजारस्थित आनन्द श्रेष्ठको चारतले घरको माथिल्लो तलाबाट शनिबार उद्धार गरिएको हो। सशस्त्र प्रहरी बल र नेपाल प्रहरीको संयुक्त टोलीले उनलाई अचेत अवस्थामा फेला पारेको थियो।

सशस्त्र प्रहरीका इन्सपेक्टर सुमनकुमार विकको नेतृत्वमा खटिएको नौ सदस्यीय टोलीले उद्धार गरेको श्रेष्ठलाई प्रारम्भिक उपचारका लागि नेपाली सेनाको हेलिकोप्टरमार्फत काठमाडौंस्थित छाउनी अस्पताल ल्याइएको हो।

सशस्त्र प्रहरी बलका केन्द्रीय प्रवक्ता नेत्रबहादुर कार्कीका अनुसार श्रेष्ठको स्वास्थ्य परीक्षण अस्पतालका चिकित्सकहरूले गरिरहेका छन्। उनको स्वास्थ्य अवस्थाका आधारमा थप उपचार अघि बढाइनेछ।

यसअघि उद्धारपछि उनलाई त्रिशूलीस्थित नेपाली सेनाको मैथिल ब्यारेकमा लैजाने तयारी गरिएको थियो। त्यसपछि आवश्यकताअनुसार काठमाडौं ल्याउने व्यवस्था मिलाइएको थियो।

सोही दिन सुरुङबाट चिनियाँ नागरिकको पनि उद्धार

बाढीपछि जारी खोज तथा उद्धार अभियानकै क्रममा सोही दिन माथिल्लो त्रिशूली–१ जलविद्युत् आयोजनाको अडिट–४ सुरुङबाट एक चिनियाँ नागरिकलाई पनि जीवितै बाहिर निकालिएको थियो।

नेपाली सेना र दक्षिण कोरियाली विपद् विज्ञ टोलीको संयुक्त प्रयासमा ती चिनियाँ नागरिकको उद्धार गरिएको सैनिक प्रवक्ता राजाराम बस्नेतले जानकारी दिएका छन्।

भोटेकोशी बाढीपछि लामो समयसम्म सम्पर्कविहीन रहेका व्यक्तिहरूको खोजी तथा उद्धारका लागि सुरक्षा निकाय र विदेशी प्राविधिक टोलीले विभिन्न प्रभावित क्षेत्रमा अभियान जारी राखेका छन्।