काठमाडौं, १३ कात्तिक। अनामनगरस्थित अनलाइन सञ्चारमाध्यम दियो पोस्टको कार्यालयमा प्रहरीले पुगेर प्रधानसम्पादक सुदीप विश्वकर्मा र समाचार संयोजक मदन ढुंगानाबारे सोधखोज गरेको छ।

कार्यालयमा सादा पोसाकमा आएका चार जना प्रहरीले दुवै पत्रकारसँग कुराकानी गर्नुपर्ने भन्दै उनीहरूलाई भेट्न आएको जानकारी दिएका थिए। त्यहाँ उपस्थित एक पत्रकारका अनुसार प्रहरीले उनीहरूलाई लिन आएको बताएका थिए।

यसअघि प्रहरीले नेपाल प्रेसका पत्रकार विश्वमणि सुवेदीलाई पनि नियन्त्रणमा लिएको थियो। त्यस्तै, नयाँ पत्रिकाको कार्यालयमा समेत सादा पोसाकका प्रहरी पुगेर पत्रकार नवराज मैनालीबारे सोधपुछ गरेका थिए।

यसैबीच, दियो पोस्टले केही समयअघि प्रधानन्यायाधीशसँग सम्बन्धित समाचारको विषयलाई लिएर आफूहरूलाई धम्की आएको समाचार प्रकाशित गरेको थियो।

एकै दिन विभिन्न सञ्चारमाध्यमका पत्रकारबारे प्रहरीले सोधखोज तथा नियन्त्रणमा लिने गतिविधि भएपछि सञ्चार क्षेत्रको ध्यान यसतर्फ केन्द्रित भएको छ। यद्यपि, प्रहरीले यी घटनाबारे आधिकारिक रूपमा के कारणले सोधपुछ गरेको हो भन्ने विषय स्पष्ट भइसकेको छैन।