काठमाडौँ, असोज २६। दसैं नजिकिँदै जाँदा बजारमा खसीको मासुको मूल्य बढेर प्रतिकिलो १ हजार ६ सयदेखि १ हजार ७ सय रुपैयाँसम्म पुगेको छ। गत वर्ष दसैंका बेला प्रतिकिलो १ हजार ३ सयदेखि १ हजार ४ सय रुपैयाँमा बिक्री भएको खसीको मासु यस वर्ष महँगिएपछि उपभोक्ता थप आर्थिक भारमा परेका छन्।

व्यापारीहरूले खसीबोकाको आपूर्ति घट्नु, ढुवानी खर्च बढ्नु र दाना महँगिनुलाई मूल्यवृद्धिको मुख्य कारण बताएका छन्। बाढीपहिरोका कारण ग्रामीण क्षेत्रबाट सहरसम्म खसीबोका ल्याउन कठिन भएको उनीहरूको भनाइ छ। यस वर्ष दसैंको मागअनुसार पर्याप्त खसीबोका उपलब्ध नहुँदा मूल्य अझ बढ्न सक्ने अनुमानसमेत गरिएको छ।

नेपाल पशुपन्छी व्यवसायी संघका अनुसार दसैंका दुई सातामा काठमाडौं उपत्यकामा मात्रै ८० हजारदेखि एक लाखसम्म जिउँदा खसीबोका खपत हुने गरेका छन्। तर यस वर्ष दसैंका लागि काठमाडौंमा करिब २५ हजार खसीबोका ल्याउने तयारी गरिएको छ, जुन गत वर्षको मागको तुलनामा झन्डै एक चौथाइ कम हो।

खसीको मूल्य बढे पनि किसानले त्यसअनुसार आम्दानी गर्न नसकेको व्यवसायीहरूको भनाइ छ। किसानबाट उपभोक्तासम्म खसीबोका आइपुग्दा तीनदेखि चार तहका बिचौलिया संलग्न हुने भएकाले मूल्यमा ठूलो अन्तर पर्ने गरेको छ। किसानले जिउँदो खसी प्रतिकिलो करिब ७ सय रुपैयाँमा बिक्री गर्दा उपभोक्ताले मासुका लागि प्रतिकिलो १ हजार ७ सय रुपैयाँसम्म तिर्नुपर्ने अवस्था छ।

यता, उपभोक्ता अधिकारकर्मीहरूले कमजोर बजार अनुगमन र बिचौलियाको प्रभावका कारण मासुको मूल्य अस्वाभाविक रूपमा बढेको बताएका छन्। उनीहरूले आपूर्ति तथा ढुवानी खर्च बढेको आधारमा मात्रै यति धेरै मूल्यवृद्धिलाई उचित मान्न नसकिने भन्दै सरकारलाई बजार अनुगमन प्रभावकारी बनाउन आग्रह गरेका छन्।

दसैंमा मूल्य नियन्त्रण गर्न विगतदेखि खसीबोका बिक्री गर्दै आएको सरकारी स्वामित्वको खाद्य व्यवस्था तथा व्यापार कम्पनीले भने यस वर्ष बिक्री नगर्ने भएको छ। बाढीपहिरोका कारण गाउँबाट खसीबोका संकलन गर्न कठिन भएको भन्दै कम्पनीले बिक्री कार्यक्रम स्थगित गरेको जनाएको छ।

मासु, माछा तथा अन्य दैनिक उपभोग्य वस्तुको मूल्य बढिरहेको अवस्थामा खसीको मासु महँगिँदा सर्वसाधारणको दसैं खर्चसमेत बढ्ने देखिएको छ। आर्थिक गतिविधि सुस्त हुनु र आम्दानीअनुसार खर्च धान्न कठिन हुनुले यस वर्ष उपभोक्ताले जिउँदो खसी किन्नुभन्दा आवश्यकताअनुसार थोरै परिमाणमा मासु खरिद गर्ने सम्भावना रहेको व्यवसायीहरूको अनुमान छ।