चौतारा, सिन्धुपाल्चोक । अन्तर्राष्ट्रिय ज्येष्ठ नागरिक दिवसको अवसरमा चौतारा साँगाचोकगढी नगरपालिकाले ज्येष्ठ नागरिकको सम्मान, संरक्षण तथा दैनिक जीवनयापनमा सहयोग पुर्‍याउने उद्देश्यले विभिन्न कार्यक्रम सञ्चालन गरेको छ। नगरपालिकाले दिवसका अवसरमा ज्येष्ठ नागरिकलाई आवश्यक सामग्री वितरण गर्नुका साथै उनीहरूको सामाजिक सुरक्षा र सम्मानजनक जीवनका लागि स्थानीय सरकारको भूमिका महत्वपूर्ण रहेको जनाएको छ।

नगरपालिकाको महिला, बालबालिका तथा ज्येष्ठ नागरिक शाखाको आयोजनामा वडा नं. ३ मा विशेष कार्यक्रम आयोजना गरी ७० जना ज्येष्ठ नागरिकलाई लौरो वितरण गरिएको छ। कार्यक्रममा वडा अध्यक्ष, वडा सदस्यलगायत जनप्रतिनिधि तथा स्थानीयवासीको सहभागिता रहेको थियो।

उमेर बढ्दै जाँदा हिँडडुल गर्न कठिन हुने ज्येष्ठ नागरिकलाई सहज आवागमनमा सहयोग पु¥याउने उद्देश्यले लौरो वितरण गरिएको नगरपालिकाले जनाएको छ। सामान्य देखिए पनि दैनिक जीवनमा आवश्यक पर्ने यस्ता सामग्रीले ज्येष्ठ नागरिकको आवागमन सहज बनाउनुका साथै उनीहरूलाई स्थानीय सरकार आफ्नो साथमा रहेको अनुभूति गराउने नगरपालिकाको विश्वास छ।

कार्यक्रममा सहभागी ज्येष्ठ नागरिकलाई सम्मान गर्दै उनीहरूको अनुभव र योगदानलाई समाजले सधैँ स्मरण गर्नुपर्नेमा जोड दिइएको थियो। परिवार र समाज निर्माणमा लामो समय योगदान गरेका ज्येष्ठ नागरिकलाई उमेरका कारण कमजोर सदस्यका रूपमा मात्र नभई ज्ञान, अनुभव र संस्कारका स्रोतका रूपमा हेर्नुपर्ने जनप्रतिनिधिको भनाइ थियो।

यसैगरी नगरपालिकाले वडा नं. १३ मा रहेका तीन जना ज्येष्ठ, अशक्त तथा एकल व्यक्तिलाई घरमै पुगेर खाद्यान्न सामग्री सहयोग गरेको छ। उनीहरूलाई चामल, दाल, नुन, तेललगायत दैनिक उपभोगमा आवश्यक सामग्री उपलब्ध गराइएको हो।

सहारा र सहयोगको आवश्यकता रहेका ज्येष्ठ तथा अशक्त व्यक्तिको घरमै पुगेर स्थानीय सरकारले सहयोग उपलब्ध गराएको नगरपालिकाले जनाएको छ। आर्थिक तथा सामाजिक रूपमा कमजोर अवस्थामा रहेका व्यक्तिलाई आधारभूत आवश्यकताका सामग्री उपलब्ध गराउँदा उनीहरूको दैनिक जीवनमा प्रत्यक्ष सहयोग पुग्ने नगरपालिकाको भनाइ छ।

ज्येष्ठ नागरिक दिवस हरेक वर्ष मनाइए पनि ज्येष्ठ नागरिकको सम्मान र संरक्षणलाई दिवसमा मात्र सीमित गर्न नहुने नगरपालिकाले जनाएको छ। ज्येष्ठ नागरिकको स्वास्थ्य, सुरक्षा, सामाजिक सहभागिता तथा सम्मानजनक जीवनयापन सुनिश्चित गर्न स्थानीय तहबाट निरन्तर पहल आवश्यक रहेको नगरपालिकाको धारणा छ।

ज्येष्ठ नागरिक परिवार, समाज र राष्ट्रका महत्वपूर्ण धरोहर मानिन्छन्। उनीहरूले आफ्नो जीवनको लामो समय परिवार, समुदाय तथा समाजको विकासमा योगदान दिएका हुन्छन्। उनीहरूसँग रहेको अनुभव, ज्ञान, सीप, संस्कार र जीवन भोगाइ नयाँ पुस्ताका लागि महत्वपूर्ण सिकाइ बन्न सक्छ।

तर सबै ज्येष्ठ नागरिकको अवस्था समान छैन। कतिपय ज्येष्ठ नागरिक परिवारको साथ र सहयोगमा सुरक्षित जीवन बिताइरहेका छन् भने कतिपय आर्थिक अभाव, अशक्तता, एक्लोपन तथा स्वास्थ्यसम्बन्धी समस्याका कारण कठिनाइमा रहेका छन्। विशेषगरी एकल तथा अशक्त ज्येष्ठ नागरिकका लागि दैनिक आवश्यकता पूरा गर्नु चुनौतीपूर्ण हुने गरेको छ।

यस्तो अवस्थामा स्थानीय सरकारको जिम्मेवारी अझ महत्वपूर्ण हुने नगरपालिकाको बुझाइ छ। ज्येष्ठ नागरिकलाई आवश्यक सहयोग उपलब्ध गराउने, उनीहरूको अवस्था पहिचान गर्ने तथा सामाजिक संरक्षणका कार्यक्रमलाई प्रभावकारी बनाउने विषयमा स्थानीय तहले ध्यान दिनुपर्ने आवश्यकता देखिएको छ।

चौतारा साँगाचोकगढी नगरपालिकाले ज्येष्ठ नागरिकलाई लक्षित गरी सञ्चालन गरेका कार्यक्रमले स्थानीय तहबाट उनीहरूको अवस्थाप्रति चासो देखाएको छ। यस्ता कार्यक्रमलाई आवश्यकताका आधारमा निरन्तरता दिँदै थप प्रभावकारी बनाउनुपर्नेमा पनि जोड दिइएको छ।

नगरपालिकाले ज्येष्ठ नागरिकको सम्मानलाई सामाजिक दायित्वका रूपमा लिँदै उनीहरूको स्वास्थ्य, सुरक्षा र सामाजिक संरक्षणलाई प्राथमिकतामा राख्ने प्रतिबद्धता जनाएको छ। स्थानीय तहले ज्येष्ठ नागरिकका लागि सञ्चालन गर्ने कार्यक्रम उनीहरूको वास्तविक आवश्यकता पहिचान गरी अघि बढाउन सके त्यसबाट थप प्रभावकारी परिणाम हासिल गर्न सकिने अपेक्षा गरिएको छ।

अन्तर्राष्ट्रिय ज्येष्ठ नागरिक दिवसको अवसरमा आयोजित कार्यक्रमले ज्येष्ठ नागरिकप्रति परिवार, समाज र स्थानीय सरकारको जिम्मेवारी सम्झाउने अवसरसमेत दिएको छ। ज्येष्ठ नागरिकलाई सम्मान गर्ने संस्कृति विकास गर्दै उनीहरूको अनुभव र ज्ञानलाई नयाँ पुस्तासँग जोड्न सके समाजमा पुस्ताबीचको सम्बन्ध थप बलियो बन्ने विश्वास नगरपालिकाले व्यक्त गरेको छ।

नगरपालिकाका अनुसार ज्येष्ठ नागरिकको सम्मान कुनै एक दिनको कार्यक्रम नभई निरन्तर सामाजिक व्यवहार र जिम्मेवारीको विषय हो। त्यसैले दिवसमा गरिने औपचारिक कार्यक्रमसँगै वर्षभरि नै ज्येष्ठ नागरिकको सुरक्षा, स्वास्थ्य, सम्मान र सामाजिक संरक्षणमा स्थानीय सरकार तथा समुदायको सक्रियता आवश्यक छ।