सिन्धुपाल्चोक । महिला आत्मनिर्भरता केन्द्रले जुगल गाउँपालिकालाई विभिन्न स्वास्थ्य सामग्री उपलब्ध गराएको छ। स्थानीय नागरिकलाई स्वास्थ्य सेवा लिन सहज होस् भन्ने उद्देश्यले केन्द्रले गाउँपालिकालाई आवश्यक सामग्री हस्तान्तरण गरेको हो।
गाउँपालिकामा आयोजित कार्यक्रममा केन्द्रका प्रतिनिधिले स्वास्थ्य सामग्री गाउँपालिका अध्यक्ष रेशम स्याङ्बोलाई हस्तान्तरण गरेका थिए। कार्यक्रममा प्रमुख प्रशासकीय अधिकृत, स्वास्थ्य शाखा प्रमुख, महिला आत्मनिर्भरता केन्द्रका संयोजक तथा अन्य प्रतिनिधिको सहभागिता थियो।
सामग्री हस्तान्तरण कार्यक्रममा अध्यक्ष स्याङ्बोले स्थानीय स्वास्थ्य सेवाको सुधारमा गैरसरकारी तथा सामाजिक संस्थाबाट प्राप्त सहयोग उपयोगी हुने बताए। उनले गाउँपालिकाले प्राप्त सामग्रीलाई आवश्यकता भएका स्वास्थ्य संस्थामा व्यवस्थित रूपमा पुर्याएर प्रभावकारी ढंगले प्रयोग गर्ने प्रतिबद्धता जनाए।
केन्द्रका प्रतिनिधिका अनुसार स्थानीय समुदायमा स्वास्थ्य सेवाको पहुँच बढाउन र आवश्यकतामा रहेका नागरिकलाई सहयोग पुर्याउने उद्देश्यले स्वास्थ्य सामग्री प्रदान गरिएको हो।
हस्तान्तरण भएका सामग्री गाउँपालिकाअन्तर्गतका स्वास्थ्य संस्थामार्फत आवश्यकता पहिचान गरी प्रयोगमा ल्याइने जनाइएको छ।
कार्यक्रममा स्थानीय तह र सामाजिक संस्थाबीचको सहकार्यलाई निरन्तरता दिन सके स्वास्थ्य सेवासँगै अन्य सामाजिक क्षेत्रमा समेत सकारात्मक प्रभाव पार्न सकिने सहभागीहरूले बताएका थिए।
२ आश्विन २०८३, शुक्रबार ११:४१
