सुनिता रखाल,चौतारा ।
कृषि उत्पादन वृद्धि, खेतीपातीलाई आधुनिकीकरण तथा किसानको श्रम र लागत घटाउने उद्देश्यले चौतारा साँगाचोकगढी नगरपालिकाले कृषकलाई विभिन्न कृषि औजार वितरण गरेको छ । नगरपालिकाको कृषि विकास शाखामार्फत सञ्चालन गरिएको कार्यक्रमअन्तर्गत विभिन्न वडाका कृषकलाई अनुदानमा कृषि उपकरण हस्तान्तरण गरिएको हो।
कार्यक्रमअन्तर्गत मिनिटिलर (हाते ट्र्याक्टर), स्प्रे मेसिन, घाँस काट्ने मेसिन, मकै छोडाउने मेसिन, पानी तान्ने मोटर, मल्चिङ सामग्री लगायतका कृषि औजार वितरण गरिएको नगरपालिकाले जनाएको छ। आधुनिक कृषि प्रविधिको प्रयोग बढाई उत्पादन लागत घटाउने, खेतीलाई सहज बनाउने र कृषकलाई व्यावसायिक खेतीतर्फ आकर्षित गर्ने उद्देश्यले औजार वितरण गरिएको हो।
नगरपालिकाका जनप्रतिनिधिहरूले कृषिलाई स्थानीय अर्थतन्त्रको आधारका रूपमा विकास गर्न नगरपालिकाले विभिन्न कार्यक्रम सञ्चालन गर्दै आएको बताएका छन्। उनीहरूका अनुसार कृषि क्षेत्रमा युवाको आकर्षण घट्दै गएको, श्रमिकको अभाव बढ्दै गएको र खेतीयोग्य जमिन बाँझिने क्रम बढिरहेका बेला आधुनिक कृषि औजारको प्रयोगले खेतीलाई सहज, छिटो र प्रभावकारी बनाउन सहयोग पुग्नेछ।
औजार प्राप्त गरेका कृषकहरूले नगरपालिकाको सहयोगले खेतीपातीमा ठूलो राहत मिलेको बताएका छन्। उनीहरूले आधुनिक उपकरणको प्रयोगबाट कम समयमा धेरै काम गर्न सकिने, उत्पादन लागत घट्ने र उत्पादन वृद्धि हुने विश्वास व्यक्त गरे। पछिल्लो समय जनशक्तिको अभावका कारण खेती गर्न कठिनाइ भइरहेको अवस्थामा यस्ता उपकरणले व्यावसायिक कृषि विस्तारमा महत्वपूर्ण टेवा पुग्ने उनीहरूको भनाइ छ।
नगरपालिकाको कृषि विकास शाखाले कृषि उत्पादन वृद्धि, खाद्य सुरक्षाको सुनिश्चितता र कृषकको आयस्तर उकास्न आगामी वर्षहरूमा पनि यस्ता कार्यक्रमलाई निरन्तरता दिइने जनाएको छ। कृषि औजार वितरणसँगै उन्नत बीउबिजन, प्राविधिक सेवा, तालिम तथा अनुदान कार्यक्रमलाई पनि प्रभावकारी रूपमा सञ्चालन गरिने जानकारी दिइएको छ।
स्थानीय सरकारले कृषकमैत्री नीति र कार्यक्रमलाई प्राथमिकतामा राख्दै कृषि क्षेत्रको आधुनिकीकरण, उत्पादन वृद्धि र किसानको जीवनस्तर सुधारलाई लक्ष्य बनाएको छ। नगरपालिकाको विश्वास छ कि आधुनिक कृषि औजारको प्रयोगले बाँझो जमिनको उपयोग बढ्नुका साथै कृषि पेशाप्रति किसान र युवाको आकर्षण समेत बढ्नेछ। यस कार्यक्रमलाई कृषि क्षेत्रको दिगो विकास र आत्मनिर्भर अर्थतन्त्र निर्माणतर्फको महत्वपूर्ण पहलका रूपमा हेरिएको छ।
२४ असार २०८३, बुधबार १४:०२
