जनतापत्र, चौतारा ।

कफी खेतीप्रति किसानहरूको आकर्षण बढ्दै गएको अवस्थामा चौतारा साँगाचोकगढी नगरपालिका–६ पिपलडाँडामा कफी बिरुवा वितरण कार्यक्रम सम्पन्न भएको छ। कार्यक्रम केरौजे साना किसान कृषि सहकारी संस्था लिमिटेडको आयोजनामा तथा चौतारा साँगाचोकगढी नगरपालिकाको आर्थिक सहयोगमा सञ्चालन गरिएको हो।

कफी खेतीलाई व्यावसायिक तथा आयआर्जनमुखी बनाउने उद्देश्यले आयोजित कार्यक्रममा स्थानीय किसानहरूलाई गुणस्तरीय कफीका बिरुवाहरू वितरण गरिएको थियो। कार्यक्रममा सहभागी किसानहरूले कफी खेतीले दीर्घकालीन आम्दानीको राम्रो सम्भावना बोकेको भन्दै यसतर्फ आकर्षण बढ्दै गएको बताएका छन्।

पिपलडाँडा क्षेत्रको हावापानी तथा भू–बनोट कफी उत्पादनका लागि उपयुक्त भएकाले किसानहरूलाई कफी खेती विस्तार गर्न प्रोत्साहन गरिएको आयोजकले जनाएको छ। पछिल्ला वर्षहरूमा परम्परागत खेतीसँगै नगदे बालीका रूपमा कफी खेती लोकप्रिय बन्दै गएको छ।

कार्यक्रममा नगरपालिकाका जनप्रतिनिधि, सहकारीका पदाधिकारी, कृषि प्राविधिक तथा स्थानीय किसानहरूको उल्लेखनीय सहभागिता रहेको थियो। सहभागीहरूले कफी खेतीले ग्रामीण अर्थतन्त्र सुदृढ बनाउन, रोजगारी सिर्जना गर्न तथा कृषकहरूको आयस्तर वृद्धि गर्न महत्वपूर्ण योगदान पुग्ने विश्वास व्यक्त गरे।

नगरपालिकाले कृषि क्षेत्रको आधुनिकीकरण र किसानहरूको जीवनस्तर उकास्ने लक्ष्यसहित यस्ता कार्यक्रमलाई आगामी दिनमा समेत निरन्तरता दिने जनाएको छ। कफी बिरुवा वितरण कार्यक्रमले पिपलडाँडाका किसानहरूलाई व्यावसायिक कृषि उत्पादनतर्फ थप प्रेरित गरेको स्थानीयवासीहरूको भनाइ छ।