काठमाडौं — नेपालमा मनसुनी र पश्चिमी वायुको आंशिक प्रभाव कायमै रहेकाले आज केही प्रदेशका पहाडी तथा हिमाली क्षेत्रमा हल्का वर्षा र हिमपात हुने सम्भावना रहेको छ।

मौसम पूर्वानुमानअनुसार कोशी, बागमती, गण्डकी र लुम्बिनी प्रदेशका हिमाली तथा पहाडी भूभागका केही स्थानमा हल्का वर्षा र हिमपात हुन सक्छ। यस्तै कर्णाली र सुदूरपश्चिमका हिमाली तथा पहाडी क्षेत्रमा एक–दुई स्थानमा पनि वर्षा र हिमपातको सम्भावना रहेको छ।

हाल मनसुनको न्यून चापीय रेखा सरदर स्थान आसपास रहेको छ। देशभर मनसुनी वायुका साथै पश्चिमी वायुको आंशिक प्रभाव देखिएको छ।

दिउँसो कहाँ कस्तो मौसम?

आज दिउँसो कोशी, बागमती, गण्डकी र लुम्बिनीका हिमाली तथा पहाडी भूभागमा सामान्यतया बादल लाग्नेछ। कर्णाली र सुदूरपश्चिमका हिमाली तथा पहाडी क्षेत्रमा भने आंशिक बदली रहने पूर्वानुमान छ।

तराईका अधिकांश भूभागमा पनि आंशिक बादल लाग्न सक्नेछ। पहाडी तथा हिमाली क्षेत्रका केही स्थानमा हल्का वर्षा र हिमपात हुने सम्भावना रहेको छ।

राति पनि केही क्षेत्रमा बदली

आज राति कोशी र बागमतीका हिमाली तथा पहाडी क्षेत्रमा सामान्यतया बादल लाग्नेछ। गण्डकी, लुम्बिनी, कर्णाली र सुदूरपश्चिमका हिमाली तथा पहाडी क्षेत्रमा आंशिक बदली रहनेछ।

तराई क्षेत्रमा भने रातिको समयमा मौसम मुख्यतया सफा रहने अनुमान छ।

राति कोशी, बागमती र गण्डकीका केही हिमाली क्षेत्रमा हल्का वर्षा तथा हिमपात हुन सक्नेछ। कोशीको पहाडी भूभागका थोरै स्थान तथा बागमती र गण्डकीका पहाडी क्षेत्रमा एक–दुई स्थानमा पनि हल्का वर्षाको सम्भावना रहेको छ।