जनतापत्र,सिन्धुपाल्चोक ।
चाडपर्वको समयमा मासुको माग बढ्ने भएकाले चौतारा साँगाचोकगढी नगरपालिकाले बजारमा बिक्री हुने मासुको गुणस्तर र स्वच्छता सुनिश्चित गर्न अनुगमनलाई तीव्र बनाएको छ। नगरपालिकाले चौतारा बजारसहित मेल्चौर, सुकुटे, साँगाचोकलगायतका क्षेत्रमा सञ्चालनमा रहेका मासु पसल तथा बधशालाको स्थलगत निरीक्षण गरेको हो।

नगर उपप्रमुख सीता थापाको नेतृत्वमा गरिएको अनुगमन टोलीले व्यवसाय सञ्चालनको अवस्था, मासुको स्वच्छता, पसलको सरसफाइ तथा उपभोक्तालाई बिक्री गरिने मासुको सुरक्षित व्यवस्थापनबारे जानकारी लिएको थियो। चाडपर्वका बेला उपभोक्ताको स्वास्थ्यलाई ध्यानमा राख्दै बजारमा गुणस्तरीय र स्वच्छ मासु उपलब्ध गराउने उद्देश्यले अनुगमन गरिएको नगरपालिकाले जनाएको छ।
अनुगमनका क्रममा मासु काट्ने तथा बिक्री गर्ने स्थानको सरसफाइ, मासु राख्ने भाँडाकुँडा तथा उपकरणको अवस्था, मासु भण्डारण गर्ने तरिका, बधशालाको व्यवस्थापन, फोहोरमैला व्यवस्थापनलगायतका विषयमा विशेष ध्यान दिइएको थियो। साथै व्यवसाय दर्ता तथा नवीकरण भए–नभएको र प्रचलित कानुन तथा मापदण्डअनुसार व्यवसाय सञ्चालन गरिएको छ कि छैन भन्ने विषयमा समेत जाँच गरिएको थियो।
अनुगमनका क्रममा केही व्यवसायमा सरसफाइ तथा व्यवस्थापन सुधार गर्नुपर्ने अवस्था भेटिएपछि तत्काल सुधार गर्न व्यवसायीलाई निर्देशन दिइएको छ। नगरपालिकाले पहिलो चरणमा व्यवसायीलाई आवश्यक जानकारी र सचेतना प्रदान गर्दै कमजोरी सच्याउन समय दिएको जनाएको छ।

उद्योग, वाणिज्य तथा पर्यटन कार्यालय सिन्धुपाल्चोकका प्रमुख त्रिपुरारी बख्रेलले व्यवसाय सञ्चालन गर्दा सम्बन्धित कानुनी प्रक्रिया तथा निर्धारित मापदण्ड अनिवार्य रूपमा पालना गर्नुपर्ने बताउनुभयो। उहाँले अनुगमनका क्रममा देखिएका कमजोरी सुधार नगरी पुनः व्यवसाय सञ्चालन गरेको पाइएमा आगामी अनुगमनका क्रममा नियमानुसार कारबाही अघि बढाइने स्पष्ट पार्नुभयो।
त्यस्तै, जनस्वास्थ्य कार्यालय सिन्धुपाल्चोकका प्रमुख दुर्गा बजगाईँले मासु पसल तथा बधशालामा स्वच्छता कायम गर्नु व्यवसायीको महत्वपूर्ण जिम्मेवारी भएको बताउनुभयो। उहाँले मासु बिक्री गर्ने स्थान सफा राख्ने, मासुलाई सुरक्षित रूपमा भण्डारण गर्ने तथा उपभोक्तालाई स्वच्छ वातावरणमा मासु बिक्री गर्ने विषयमा व्यवसायी गम्भीर हुनुपर्नेमा जोड दिनुभयो।
नगरपालिकाका अनुसार दर्ता वा नवीकरण नगरी व्यवसाय सञ्चालन गरिरहेका केही व्यवसायीले आवश्यक कानुनी प्रक्रिया पूरा गर्ने प्रतिबद्धता जनाएका छन्। अनुगमन टोलीले व्यवसायीलाई केवल कारबाही गर्नेभन्दा पनि सुधारका लागि सचेत गराउने र उपभोक्ताको स्वास्थ्यसँग जोडिएका विषयमा जिम्मेवार बनाउन प्राथमिकता दिएको जनाएको छ।
यसअघि बुधबार पनि नगरपालिकाले वडा नम्बर ५ र ७ मा सञ्चालनमा रहेका मासु पसल तथा बधशालाको निरीक्षण गरेको थियो। सो क्रममा ११ वटा मासु पसल र दुईवटा बधशालाको अनुगमन गरिएको नगरपालिकाले जनाएको छ। अनुगमनमा केही स्थानमा सरसफाइ, मासु राख्ने तरिका र समग्र व्यवस्थापनमा सुधार आवश्यक रहेको पाइएको थियो।
अनुगमन टोलीमा वडा नम्बर ५ का अध्यक्ष शिव श्रेष्ठ, वडा नम्बर १० का अध्यक्ष निलबहादुर तामाङ र वडा नम्बर १२ का अध्यक्ष दीपेन्द्र नेपाल सहभागी हुनुहुन्थ्यो। त्यसैगरी उद्योग, वाणिज्य तथा पर्यटन कार्यालयका प्रमुख त्रिपुरारी बख्रेल, उद्योग वाणिज्य संघका प्रतिनिधि, प्रहरी, नगरपालिकाका कर्मचारी, जनप्रतिनिधि तथा सञ्चारकर्मीको समेत सहभागिता रहेको थियो।
नगरपालिकाले बजार अनुगमनलाई चाडपर्वमा मात्र सीमित नराखी नियमित रूपमा सञ्चालन गर्ने जनाएको छ। उपभोक्ताको स्वास्थ्यमा प्रत्यक्ष असर पार्न सक्ने खाद्य वस्तुको गुणस्तर र स्वच्छताका विषयमा स्थानीय सरकार, व्यवसायी र उपभोक्ता तीनै पक्ष जिम्मेवार हुनुपर्ने सरोकारवालाको भनाइ छ।
मासु व्यवसायीले पनि व्यवसाय सञ्चालन गर्दा स्वच्छता र कानुनी मापदण्डलाई प्राथमिकता दिनुपर्ने तथा उपभोक्ताले समेत मासु खरिद गर्दा पसलको सरसफाइ, मासुको अवस्था र बिक्रीस्थलको व्यवस्थापनमा ध्यान दिनुपर्ने बताइएको छ।
चाडपर्वका बेला खाद्य वस्तुको कारोबार बढ्ने भएकाले आगामी दिनमा समेत बजार अनुगमनलाई निरन्तरता दिँदै उपभोक्ताको स्वास्थ्य र खाद्य सुरक्षालाई प्राथमिकतामा राख्ने नगरपालिकाले जनाएको छ। स्वच्छ तथा सुरक्षित खाद्य वस्तुको उपलब्धता सुनिश्चित गर्न अनुगमनसँगै व्यवसायीमा सचेतना र उपभोक्तामा जागरुकता बढाउने कामलाई पनि अघि बढाइने नगरपालिकाको भनाइ छ।