जनतापत्र, मेलम्ची।

मेलम्ची नगरपालिकाको विपद् व्यवस्थापन क्षमता अभिवृद्धि गर्ने उद्देश्यले आवश्यक सामग्री तथा एलईडी स्क्रिन हस्तान्तरण गरिएको छ। नगर प्रमुख आइतमान तामाङको अध्यक्षतामा सम्पन्न नगरस्तरीय विपद् व्यवस्थापन तथा जलवायु उत्थानशील समितिको बैठकमा उक्त सामग्री हस्तान्तरण गरिएको हो।

बैठकमा Regional Integrated Multi-Hazard Early Warning System (RIMES) ले SLMC परियोजनाअन्तर्गत नगरपालिकामा सञ्चालन गरेका गतिविधि तथा हासिल भएका उपलब्धिबारे प्रस्तुतीकरण गरेको थियो। परियोजनामार्फत विपद् जोखिम न्यूनीकरण, पूर्वसूचना प्रणालीको विकास र स्थानीय तहको विपद् सामना गर्ने क्षमता अभिवृद्धिका लागि भएका प्रयासबारे जानकारी गराइएको थियो।

कार्यक्रममा विपद् व्यवस्थापनलाई प्रभावकारी बनाउन सूचना प्रवाह र प्रविधिको प्रयोगलाई प्राथमिकता दिनुपर्ने विषयमा छलफल भएको थियो। विशेषगरी बाढी, पहिरो तथा अन्य प्राकृतिक विपद्का सम्भावित जोखिमबारे समयमै जानकारी प्राप्त गरी नागरिकलाई सचेत गराउन सके जनधनको क्षति कम गर्न सकिनेमा जोड दिइएको थियो।

RIMES ले उपलब्ध गराएका सामग्री तथा एलईडी स्क्रिनले नगरपालिकाको विपद् पूर्वतयारी र सूचना सम्प्रेषण प्रणालीलाई थप व्यवस्थित बनाउन सहयोग पुग्ने अपेक्षा गरिएको छ। एलईडी स्क्रिनमार्फत मौसमको अवस्था, सम्भावित प्राकृतिक जोखिम, पूर्वचेतावनी तथा विपद्सम्बन्धी आवश्यक सन्देश नागरिकसम्म पुर्‍याउन सहज हुने विश्वास गरिएको छ।

सिन्धुपाल्चोक जिल्ला भौगोलिक बनावटका कारण बाढी, पहिरो, भूकम्पलगायत प्राकृतिक विपद्को जोखिममा रहेको छ। मेलम्ची क्षेत्रमा विगतमा बाढी तथा पहिरोका घटनाले ठूलो जनधनको क्षति पुर्‍याइसकेका छन्। यस्तो अवस्थामा विपद् आउनुअघि नै जोखिम पहिचान गर्ने, पूर्वसूचना उपलब्ध गराउने र सम्भावित प्रभावित समुदायलाई सुरक्षित रहन सचेत बनाउने कार्य महत्त्वपूर्ण मानिन्छ।

बैठकमा जलवायु परिवर्तनका कारण उत्पन्न हुन सक्ने जोखिम न्यूनीकरण तथा विपद् व्यवस्थापनका लागि स्थानीय तहको भूमिका प्रभावकारी बनाउनुपर्ने आवश्यकतासमेत औँल्याइएको थियो। पूर्वसूचना प्रणालीलाई व्यवहारमा उपयोग गर्ने, उपलब्ध प्रविधिको उचित प्रयोग गर्ने र सरोकारवाला निकायबीच समन्वय बढाउने विषयलाई प्राथमिकता दिनुपर्ने देखिएको छ।

नगरपालिकाको विपद् व्यवस्थापन प्रणालीलाई प्रविधिमैत्री बनाउँदै नागरिकको सुरक्षा सुनिश्चित गर्न हस्तान्तरण गरिएका सामग्री उपयोगी हुने अपेक्षा गरिएको छ। साथै, यस्ता कार्यक्रमले विपद् जोखिम न्यूनीकरण, जलवायु उत्थानशीलता र स्थानीय समुदायको विपद् प्रतिकार्य क्षमता विकासमा योगदान पुर्‍याउने विश्वास गरिएको छ।