जवनतापत्र,सिन्धुपाल्चोक ।
“प्राप्त अधिकारको रक्षा आजको आवश्यकता, पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता” भन्ने मूल नारासहित ३१औँ विश्व आदिवासी जनजाति दिवसको अवसरमा चौतारा साँगाचोकगढी नगरपालिकाको नगर सभाहलमा शुभकामना आदान–प्रदान कार्यक्रम सम्पन्न भएको छ। नेपाल आदिवासी जनजाति महासंघ नगर समन्वय परिषद् चौतारा साँगाचोकगढी नगरपालिकाको आयोजनामा तथा राष्ट्रिय आदिवासी जनजाति महिला महासंघ जिल्ला समन्वय परिषद् सिन्धुपाल्चोकको सहआयोजनामा कार्यक्रम सम्पन्न भएको हो।

कार्यक्रमका प्रमुख अतिथि चौतारा साँगाचोकगढी नगरपालिकाका नगर प्रमुख कृष्णप्रसाद सापकोटाले आदिवासी जनजाति समुदाय नेपालको बहुजातीय, बहुभाषिक र बहुसांस्कृतिक पहिचानका महत्वपूर्ण संवाहक भएको उल्लेख गर्दै उनीहरूको भाषा, संस्कृति, कला, परम्परा र मौलिक ज्ञानको संरक्षण गर्नु राज्य र समाज दुवैको साझा दायित्व भएको बताए।

उनले संविधानले सुनिश्चित गरेका आदिवासी जनजातिका अधिकारको प्रभावकारी कार्यान्वयन गर्दै विकासका हरेक अवसरमा समान सहभागिता सुनिश्चित गर्न स्थानीय सरकार प्रतिबद्ध रहेको उल्लेख गरे। नगरभित्र रहेका सबै जातजाति, भाषा, धर्म र संस्कृतिको सम्मान गर्दै समावेशी विकासलाई प्राथमिकतामा राखेर योजना कार्यान्वयन भइरहेको पनि उनले जानकारी दिए।

कार्यक्रममा नगर उपप्रमुख सीता थापाले आदिवासी जनजाति समुदायको पहिचान, भाषा, संस्कृति तथा परम्परागत ज्ञानलाई भावी पुस्तासम्म हस्तान्तरण गर्न सबैको साझा प्रयास आवश्यक रहेको बताइन्। उनले महिलाको सहभागिता, नेतृत्व विकास, शिक्षा, स्वास्थ्य तथा आर्थिक सशक्तीकरणलाई स्थानीय सरकारले विशेष प्राथमिकतामा राखेको उल्लेख गर्दै समावेशी समाज निर्माणका लागि सबै समुदायबीच आपसी सम्मान र सहकार्य आवश्यक रहेको धारणा व्यक्त गरिन्।

नगरपालिकाका प्रमुख प्रशासकीय अधिकृतले स्थानीय सरकार संविधानले परिकल्पना गरेको समावेशी शासन प्रणाली कार्यान्वयन गर्न प्रतिबद्ध रहेको बताउँदै आदिवासी जनजातिका अधिकार संरक्षणसँगै उनीहरूको भाषा, संस्कृति र परम्पराको संरक्षणका लागि विभिन्न कार्यक्रम सञ्चालन भइरहेको जानकारी दिए। उनले स्थानीय तहले विकास निर्माणसँगै सांस्कृतिक संरक्षणलाई पनि समान महत्व दिएको उल्लेख गरे।

कार्यक्रममा विभिन्न वडाका वडा अध्यक्ष, जनप्रतिनिधि, नेपाल आदिवासी जनजाति महासंघका पदाधिकारी, राष्ट्रिय आदिवासी जनजाति महिला महासंघका प्रतिनिधि, विभिन्न जातीय संस्थाका अगुवा, सामाजिक अभियन्ता, बुद्धिजीवी, सञ्चारकर्मी तथा सरोकारवालाको उल्लेखनीय सहभागिता रहेको थियो।

वक्ताहरूले विश्व आदिवासी जनजाति दिवस केवल उत्सवको दिन नभई आदिवासी जनजाति समुदायका अधिकार, पहिचान, समानता र सामाजिक न्यायका विषयमा पुनः प्रतिबद्धता जनाउने अवसर भएको बताए। उनीहरूले आदिवासी जनजातिको भाषा, लिपि, संस्कृति, परम्परागत सीप, ज्ञान र जीवनशैली नेपालको अमूल्य सम्पदा भएकाले यसको संरक्षण र प्रवद्र्धनमा राज्यका सबै तहले विशेष ध्यान दिनुपर्ने धारणा राखे।

कार्यक्रममा संविधानले प्रत्याभूत गरेका मौलिक हक, समानुपातिक समावेशी प्रतिनिधित्व, सामाजिक न्याय तथा आदिवासी जनजातिको अधिकार प्रभावकारी रूपमा कार्यान्वयन गर्नुपर्ने विषयमा समेत जोड दिइएको थियो। साथै, अन्तर्राष्ट्रिय श्रम संगठन (क्ष्ीइ) महासन्धि–१६९ तथा आदिवासी जनजातिको अधिकारसम्बन्धी संयुक्त राष्ट्रसंघीय घोषणापत्रको प्रभावकारी कार्यान्वयनका लागि सम्बन्धित निकायले थप पहल गर्नुपर्ने माग पनि सहभागीहरूले उठाएका थिए।

सहभागीहरूले आदिवासी जनजाति समुदायको मौलिक संस्कृति, भाषा र परम्परागत जीवनशैली आधुनिकताको प्रभावसँगै लोप हुने जोखिम बढ्दै गएको उल्लेख गर्दै विद्यालय तहदेखि नै मातृभाषा शिक्षा, सांस्कृतिक संरक्षण, परम्परागत कला तथा सीपको प्रवद्र्धनका कार्यक्रमलाई प्राथमिकता दिनुपर्ने सुझाव दिएका थिए। स्थानीय स्तरमा सञ्चालन हुने सांस्कृतिक महोत्सव, भाषा संरक्षण अभियान र युवा पुस्तालाई लक्षित कार्यक्रमले सांस्कृतिक सम्पदाको संरक्षणमा महत्वपूर्ण योगदान पुग्ने विश्वास व्यक्त गरिएको थियो।

कार्यक्रममा विभिन्न समुदायका प्रतिनिधिहरूले शुभकामना मन्तव्य व्यक्त गर्दै आदिवासी जनजातिबीच एकता, सहकार्य र आपसी सद्भावलाई अझ सुदृढ बनाउनुपर्नेमा जोड दिएका थिए। उनीहरूले सबै समुदायबीच समान अवसर, समान सम्मान र समान अधिकार सुनिश्चित भए मात्र समृद्ध र समावेशी समाज निर्माण सम्भव हुने धारणा व्यक्त गरे।

कार्यक्रमको अन्त्यमा आयोजक संस्थाले विश्व आदिवासी जनजाति दिवसलाई केवल औपचारिक कार्यक्रममा सीमित नराखी समुदायका वास्तविक समस्या समाधान, अधिकार संरक्षण, सांस्कृतिक पहिचानको प्रवद्र्धन तथा समावेशी विकासको अभियानका रूपमा अगाडि बढाउने प्रतिबद्धता जनाएको थियो। सहभागीहरूले पनि सामाजिक सद्भाव, सांस्कृतिक विविधताको सम्मान तथा समतामूलक समाज निर्माणका लागि सबै पक्ष मिलेर अघि बढ्नुपर्ने आवश्यकता औँल्याएका थिए।

शुभकामना आदान–प्रदानसँगै सम्पन्न कार्यक्रमले आदिवासी जनजाति समुदायको अधिकार, पहिचान, समानता र सांस्कृतिक संरक्षणप्रति स्थानीय सरकार तथा सरोकारवाला निकायहरूको प्रतिबद्धतालाई पुनः उजागर गरेको सहभागीहरूको विश्वास रहेको छ।