जनतापत्र, सिन्धुपाल्चोक । — इन्द्रावती गाउँपालिकाका तीन सामुदायिक विद्यालयमा अध्ययनरत विद्यार्थीहरूलाई न्यानो कपडा, शैक्षिक सामग्री तथा विद्यालय विकासका लागि आर्थिक सहयोग प्रदान गरिएको छ। शिक्षा क्षेत्रमा सहयोग गर्ने उद्देश्यले सञ्चालन भइरहेको अभियानअन्तर्गत वडा नं. ९ र १० का विद्यालयमा सामग्री वितरण कार्यक्रम सम्पन्न भएको हो।

वडा नं. १० स्थित सूर्योदय आधारभूत विद्यालय तथा वडा नं. ९ का सिपातिनधारा जनता माध्यमिक विद्यालय र जलेश्वरी आधारभूत विद्यालयमा आयोजित कार्यक्रममा विद्यार्थीहरूलाई न्यानो कपडा तथा आवश्यक शैक्षिक सामग्री हस्तान्तरण गरिएको थियो। कार्यक्रममार्फत विद्यालयको शैक्षिक वातावरण सुधार गर्न तथा विद्यार्थीहरूलाई अध्ययनमा थप प्रोत्साहन दिन सहयोग गरिएको आयोजक पक्षले जनाएको छ।

सिपातिनधारा जनता माध्यमिक विद्यालयमा आयोजित कार्यक्रममा बोल्दै वडा नं. ९ का अध्यक्ष बाबुराम लामाले शिक्षा क्षेत्रमा भएको यस्ता सहयोगले विद्यालय र विद्यार्थी दुवैलाई सकारात्मक ऊर्जा प्रदान गर्ने बताउनुभयो। उहाँले ग्रामीण क्षेत्रका विद्यार्थीहरूको शैक्षिक उन्नतिका लागि समाजका विभिन्न क्षेत्रबाट सहयोग जुट्नु आवश्यक रहेको उल्लेख गर्नुभयो। बालबालिकाको भविष्य निर्माणमा समुदायको साथ र सहयोग महत्वपूर्ण हुने भएकाले यस्ता अभियानलाई निरन्तरता दिनुपर्ने उहाँको धारणा थियो।

कार्यक्रममा विद्यालय व्यवस्थापन समितिका अध्यक्ष प्रकाश मैनालीले विद्यालयलाई प्राप्त सहयोगले विद्यार्थीहरूको मनोबल बढाउनुका साथै विद्यालयको दीर्घकालीन विकासमा समेत योगदान पुग्ने विश्वास व्यक्त गर्नुभयो। विद्यालयको शैक्षिक तथा भौतिक विकासका लागि विभिन्न क्षेत्रबाट सहयोग आवश्यक रहेको बताउँदै उहाँले सहयोगी व्यक्तित्वहरूप्रति आभार व्यक्त गर्नुभयो।

कार्यक्रममा सहभागी समाजसेवी मोहनबहादुर गिरीले सामुदायिक विद्यालयमा अध्ययनरत विद्यार्थीहरूलाई सहयोग गर्ने उद्देश्यले गाउँपालिकाभित्र अभियान सञ्चालन भइरहेको जानकारी दिनुभयो। उहाँले आर्थिक अभावका कारण कुनै पनि बालबालिका शिक्षाबाट टाढिन नपरोस् भन्ने उद्देश्यले विभिन्न विद्यालयमा पुगेर सहयोग गर्दै आएको बताउनुभयो। शिक्षा व्यक्तिको मात्र नभई समाज र राष्ट्र निर्माणको आधार भएकाले यस क्षेत्रमा लगानी आवश्यक रहेको उहाँको भनाइ थियो।

उहाँले आर्थिक अवस्था कमजोर भएका तर अध्ययनमा रुचि भएका विद्यार्थीहरूलाई आवश्यक सहयोग गर्न आफू सधैं तयार रहेको प्रतिबद्धता व्यक्त गर्नुभयो। प्राविधिक तथा उच्च शिक्षा अध्ययन गर्न चाहने विद्यार्थीहरूलाई पनि आफ्नो क्षमताअनुसार सहयोग उपलब्ध गराउँदै आएको उहाँले जानकारी दिनुभयो।

कार्यक्रमकै अवसरमा सिपातिनधारा जनता माध्यमिक विद्यालयको अक्षय कोषका लागि रु. ५५ हजार ५ सय ५५ आर्थिक सहयोग प्रदान गरिएको थियो। उक्त सहयोगले विद्यालयको शैक्षिक गतिविधि सञ्चालन तथा भविष्यका योजनाहरू कार्यान्वयन गर्न सहयोग पुग्ने विश्वास व्यक्त गरिएको छ।

सूर्योदय आधारभूत विद्यालयमा आयोजित कार्यक्रममा विद्यालयको भौतिक तथा शैक्षिक वातावरण सुधारका विषयमा पनि छलफल भएको थियो। कार्यक्रममा बोल्दै मोहनबहादुर गिरीले गर्मी मौसममा विद्यार्थी तथा शिक्षकहरूले भोग्ने समस्यालाई ध्यानमा राख्दै विद्यालयमा आवश्यक पंखा उपलब्ध गराउने प्रतिबद्धता व्यक्त गर्नुभयो। साथै विद्यालयलाई आवश्यक पर्ने अन्य सहयोगका विषयमा पनि सकारात्मक पहल गर्ने उहाँले बताउनुभयो।

कार्यक्रममा इन्द्रावती गाउँपालिका वडा नं. २ का अध्यक्ष श्यामबहादुर गिरीले समाजमा सकारात्मक परिवर्तन ल्याउन यस्ता अभियानले महत्वपूर्ण भूमिका खेल्ने बताउनुभयो। शिक्षा क्षेत्रमा गरिने सहयोग दीर्घकालीन लगानी भएको उल्लेख गर्दै उहाँले सामुदायिक विद्यालयको गुणस्तर सुधारका लागि सबै पक्षको सहकार्य आवश्यक रहेको धारणा राख्नुभयो।

जलेश्वरी आधारभूत विद्यालयका प्रधानाध्यापक रामशरण नेपालले विद्यार्थीहरूलाई प्रदान गरिएको न्यानो कपडा तथा शैक्षिक सामग्रीले अध्ययनप्रतिको उत्साह बढाउने विश्वास व्यक्त गर्नुभयो। यस्ता सहयोगले विद्यालयमा नियमित उपस्थिति वृद्धि गर्न र विद्यार्थीहरूको आत्मविश्वास बढाउन सहयोग पुग्ने उहाँको भनाइ थियो।

त्यसैगरी सिपातिनधारा जनता माध्यमिक विद्यालयका प्रधानाध्यापक महेन्द्रकुमार तामाङले आधुनिक र प्रविधिमैत्री शिक्षाको आवश्यकता औँल्याउँदै विद्यालयको शैक्षिक गुणस्तर अभिवृद्धिका लागि सामुदायिक तथा सामाजिक सहयोग अपरिहार्य रहेको बताउनुभयो। उहाँले सहयोगी व्यक्तित्वहरूलाई धन्यवाद दिँदै आगामी दिनमा पनि यस्ता कार्यक्रम जारी रहने अपेक्षा व्यक्त गर्नुभयो।

सूर्योदय आधारभूत विद्यालयमा सम्पन्न कार्यक्रम स्थानीय जनप्रतिनिधि, शिक्षक, अभिभावक तथा विद्यार्थीहरूको उपस्थितिमा सम्पन्न भएको थियो। कार्यक्रममा सहभागीहरूले सामुदायिक विद्यालयको विकास, विद्यार्थीहरूको शैक्षिक पहुँच विस्तार तथा गुणस्तरीय शिक्षाको सुनिश्चितताका लागि यस्ता सहयोगी अभियानहरू प्रभावकारी हुने बताएका थिए।

शिक्षा क्षेत्रमा केन्द्रित यस प्रकारका सामाजिक अभियानले ग्रामीण क्षेत्रका विद्यार्थीहरूलाई प्रत्यक्ष लाभ पुर्‍याउनुका साथै सामुदायिक विद्यालयप्रति अभिभावक र समुदायको विश्वास बढाउन समेत महत्वपूर्ण योगदान पुर्‍याउने अपेक्षा गरिएको छ।