जनतापत्र,सिन्धुपाल्चोक ।
सिन्धुपाल्चोकको सुकुटेमा होटल तथा पर्यटन व्यवसायी संघ नेपाल, बागमती प्रदेशको छैटौँ साधारणसभा सम्पन्न भएको छ। संघको आयोजनामा सम्पन्न साधारणसभामा कार्यसमितिका पदाधिकारी, सदस्य, सल्लाहकार, विभिन्न जिल्लाबाट आएका प्रतिनिधि तथा पर्यवेक्षकहरूको उल्लेख्य उपस्थिति रहेको थियो। साधारणसभामा बागमती प्रदेशअन्तर्गतका १३ वटै जिल्लाबाट आएका होटल तथा पर्यटन व्यवसायीहरूको सहभागिता रहेको जनाइएको छ। कार्यक्रममा सहभागी व्यवसायीहरूले वर्तमान अवस्थामा पर्यटन तथा होटल व्यवसायले भोग्नुपरेका चुनौती, अवसर र सम्भावनाबारे गम्भीर छलफल गरेका थिए।

कार्यक्रमलाई सम्बोधन गर्दै वक्ताहरूले नेपाल प्राकृतिक, सांस्कृतिक, ऐतिहासिक तथा भौगोलिक विविधताले भरिपूर्ण मुलुक भए पनि पर्यटन क्षेत्र अपेक्षित रूपमा अघि बढ्न नसकेको बताएका छन्। राज्यका सम्बन्धित निकायहरूको कमजोर व्यवस्थापन, नीतिगत अस्पष्टता, पूर्वाधार विकासको कमी र प्रशासनिक ढिलासुस्तीका कारण पर्यटन उद्योगले गति लिन नसकेको उनीहरूको भनाइ थियो।

कोभिड–१९ महामारीपछि पर्यटन तथा होटल व्यवसाय सबैभन्दा बढी प्रभावित क्षेत्रमध्ये एक भएको उल्लेख गर्दै व्यवसायीहरूले अहिले पनि त्यसको असर पूर्ण रूपमा हट्न नसकेको बताए। यस कठिन परिस्थितिमा पनि व्यवसायलाई बचाइराख्न, रोजगारी सिर्जना गर्न र सेवाको गुणस्तर कायम राख्न व्यवसायीहरू प्रतिबद्ध रहेको जनाइएको छ। साधारणसभामा संघले पर्यटन क्षेत्रको विकासका लागि निजी क्षेत्रको भूमिका अझ सशक्त बनाउँदै व्यवसायिक मर्यादा, गुणस्तर र सेवामा सुधार गर्ने प्रतिवद्धता व्यक्त गरेको छ। साथै, युवा जनशक्तिलाई सीपमूलक तालिममार्फत सक्षम बनाउँदै स्वदेशमै रोजगारीका अवसर सिर्जना गर्न संघले निरन्तर पहल गर्ने जनाएको छ। कार्यक्रमको अन्त्यमा बागमती प्रदेशअन्तर्गतका सबै जिल्लाका होटल तथा पर्यटन व्यवसायीहरूको हित, प्रवर्द्धन र विकासका लागि संघ एकताबद्ध भएर अघि बढ्ने निर्णय गरिएको छ।