चौतारा सिन्धुपाल्चोक ।

हेलम्बु गाउँपालिका–७ माहाँकालमा आर्थिक सशक्तिकरण, बाख्रा वितरण, पशुपालन अभिमुखीकरण तथा विद्यालय सहयोगसम्बन्धी कार्यक्रम आज सम्पन्न भयो। परिवर्तनका लागि सहकार्य नेपालले आयोजना गरेको सो कार्यक्रम हेलम्बु गाउँपालिकाको समन्वयमा गरिएको हो। कार्यक्रममार्फत वडा ६ र ७ का ८ जनालाई बाख्रा वितरण गरियो भने एक जनालाई बाख्रा हस्तान्तरण गरिएको छ। पशुपालनका विषयमा वडा नम्बर ७ का पशुप्राविधिक देवराज शर्माले रोग व्यवस्थापन, हेरचाह, पोषण तथा प्राविधिक पक्षबारे अभिमुखीकरण प्रदान गरे। संस्थाले २०६९ सालदेखि हेलम्बु–६ क्षेत्रमा शैक्षिक तथा व्यावसायिक कार्यक्रम सञ्चालन गर्दै आएको छ। संस्थाबाट बाख्रा प्राप्त गर्ने हेलम्बु–७ की चनमती सुनारले आयआर्जनसँगै घरधन्दा चलाउन सहयोग पुगेको बताए। यस्तै, महेन्द्र माध्यमिक विद्यालयकी कक्षा ९ की छात्रा श्रीजना तामाङले स्टेशनरी तथा गत वर्ष प्राप्त बाख्राले आफ्नो अध्ययन सहज भएको अनुभव सुनाइन्। कार्यक्रमका अवसरमा महेन्द्र माध्यमिक विद्यालयको इसीडी कक्षाका लागि चकटी तथा इचोक माध्यमिक विद्यालयलाई खेलौना सामग्री हस्तान्तरण गरिएको थियो। साथै ३२ जनालाई शैक्षिक सामग्री पनि वितरित गरिएको सामाजिक परिचालक गीता चौलागाईंले जानकारी दिइन्। वडा ७ का अध्यक्ष निलबहादुर खड्काले सहयोग प्राप्त विद्यार्थीहरूमा पढाइ कमजोर भएको गुनासो बढेको बताउँदै अभिभावकले विशेष ध्यान दिनुपर्नेमा जोड दिए। महेन्द्र माध्यमिक विद्यालयका प्रधानाध्यापक उद्धव लामिछानेले सहयोगले अभिभावक तथा विद्यार्थी दुवैको आर्थिक पक्ष सुदृढ भएको भए पनि यसको सदुपयोग अनिवार्य रहेको बताए।कार्यक्रम अभिभावक समूहकी अध्यक्ष सितामाया तामाङको अध्यक्षतामा सम्पन्न भएको थियो भने सहजीकरण संस्थाकी शिक्षा अधिकृत रोमिला घलले गरेकी थिइन्।