जनतापत्र, हेलम्बु सिन्धुपाल्चोक ।
हेलम्बु गाउँपालिकास्थित हेलम्बु प्राथमिक अस्पतालमा चार दिनसम्म चलेको बृहत स्वास्थ्य शिविर बिहीबार सम्पन्न भएको छ। गाउँपालिकाको आयोजनामा, जनस्वास्थ्य कार्यालय सिन्धुपाल्चोकको समन्वय र ग्रेस बप्तिस चर्च ताइवान तथा फेयरमेडको सहयोगमा सम्पन्न शिविरमा ९३७ जनाले विभिन्न स्वास्थ्य सेवा लिएका छन्। शिविरमा दन्त सेवाका ३८५, स्त्री रोगका १७४, छाला रोगका ६२ र सामान्य स्वास्थ्य परीक्षणका ३१६ जनाले सेवा लिएका थिए। मांक, बौद्ध डुनामिस र ग्याल्थुम डुनामिस चर्चले शिविर समन्वय गरेका थिए। गत सोमबार गाउँपालिकाका अध्यक्ष निमा ग्याल्जेन शेर्पाले उद्घाटन गर्नुभएको शिविरमा ताइवानका वरिष्ठ चिकित्सक तथा नेपाली चिकित्सकहरूले दाँत, बाल रोग, स्त्री रोग, छालासम्बन्धी समस्या लगायतका रोगहरूको परीक्षण, उपचार र निःशुल्क औषधि वितरण गरेका थिए। समापन कार्यक्रममा प्रमुख प्रशासकीय अधिकृत बेनीबहादुर मोक्तानले यस्ता स्वास्थ्य शिविरले समुदायमा स्वास्थ्य सचेतना बढाउने बताउँदै आगामी दिनमा निरन्तरता दिन सुझाव दिनुभयो। स्वास्थ्य शाखा प्रमुख मुकेश भट्टराईले कार्यक्रम सफल बनाउन सहयोग गर्ने सबैप्रति आभार व्यक्त गर्नुभयो।