जनतापत्र, हेलम्बु सिन्धुपाल्चोक ।
हेलम्बु गाउँपालिकाको आयोजना, जनस्वास्थ्य कार्यालय सिन्धुपाल्चोकको समन्वय तथा ग्रेस ब्याप्टिस्ट चर्च ताइवान र फेयरमेडको सहयोगमा हेलम्बु गाउँपालिकामा बृहत् निःशुल्क स्वास्थ्य शिविर सुरु भएको छ। कार्यक्रममा माङ्क, बौद्ध डुनामिस चर्च र ग्याल्थुम डुनामिस चर्चले पनि सहकार्य गरेका छन्। शिविरको उद्घाटन गाउँपालिका अध्यक्ष निमा ग्याल्जेन शेर्पाले गर्नुभयो। उद्घाटन कार्यक्रममा बोल्दै अध्यक्ष शेर्पाले गाउँ–गाउँमा स्वास्थ्य सेवा विस्तार गर्न गाउँपालिकाले कुनै कसर बाँकी नराख्ने प्रतिबद्धता जनाउनुभयो। उहाँले यस्ता स्वास्थ्य शिविरहरूले दुर्गम क्षेत्रमा रहेका नागरिकलाई स्वास्थ्य सुविधा प्राप्त गर्न सहज बनाउने बताउनुभयो। शिविरमा दन्त रोग, बाल रोग, स्त्री रोग, छालासम्बन्धी समस्या र सामान्य रोगका बिरामीहरूको परीक्षण, उपचार, परामर्श तथा निःशुल्क औषधि वितरण गरिएको छ। ताइवानका वरिष्ठ चिकित्सकहरू र नेपाली चिकित्सकहरूको टोलीले बिरामीहरूको स्वास्थ्य परीक्षण गरिरहेका छन्। पहिलो दिन मात्र १२५ जनाभन्दा बढी बिरामीले सेवा लिएका छन्। चार दिने यो स्वास्थ्य शिविर कार्तिक २० गते सम्पन्न हुने जनस्वास्थ्य शाखा प्रमुख मुकेश भट्टराईले जानकारी दिनुभयो।