आइसिँ तामाङ,पाँचपोखरी सिन्धुपाल्चोक ।
स्वास्थ्य सेवा पहुँचलाई प्रविधिमैत्री बनाउने उद्देश्यले सिन्धुपाल्चोकको पाँचपोखरी थाङपाल गाउँपालिकामा टेलिमेडिसिन सेवा सुरु गरिएको छ।
भक्तपुर अस्पतालसँगको सहकार्यमा सञ्चालित यो सेवा आज परिक्षण चरणमा सफलतापूर्वक सम्पन्न गरिएको छ।
प्रदेश स्वास्थ्य मन्त्रालयका मन्त्री किरण थापाको प्रस्तावलाई सहर्ष स्वीकार गर्दै गाउँपालिका अध्यक्ष टासी लामाले निर्देशन दिएअनुसार सेवा सञ्चालन गरिएको हो। टेलिमेडिसिनमार्फत अब स्थानीय बासिन्दाले भक्तपुर अस्पतालका विशेषज्ञहरूसँग प्रत्यक्ष परामर्श गर्न सक्नेछन्।
सेवाको सफल परीक्षणमा प्रदेश स्वास्थ्य मन्त्रालयका सचिव डा. खगेश्वरी गेलाल, जिल्ला जनस्वास्थ्य कार्यालय प्रमुख, भक्तपुर अस्पतालका चिकित्सक, गाउँपालिकाका प्रमुख प्रशासकीय अधिकृत लक्ष्मण कुईकेल, सूचना प्रविधि शाखाका प्रतिनिधि लगायत विभिन्न निकायका अधिकारीहरूको सक्रिय भूमिका रहेको गाँउपालिकाका सुचना प्रविधि अधिकृत नारायण क्षेत्रीले जानकारी दिनुभयो ।
गाउँपालिकाले यस सेवाबाट दुर्गम भेगका नागरिकले सहज रूपमा गुणस्तरीय स्वास्थ्य सेवा पाउने अपेक्षा गरिएको बताएको छ। टेलिमेडिसिन सेवा ग्रामीण क्षेत्रमा स्वास्थ्य सेवा विस्तार गर्न एक महत्वपूर्ण पाइला मानिएको छ।