जनतापत्र,रसुवा ।
अविरल वर्षाका कारण क्षतिग्रस्त स्याफ्रु–रसुवागढी सडक खण्डको मर्मत कार्य सुरु भएको छ। मर्मतका लागि गोसाइँकुण्ड गाउँपालिकाको एक्स्काभेटर र सडक विभागको डोजर परिचालन गरिएको गाउँपालिका कार्यालयले जनाएको छ।
याङयाङदेखि रसुवागढीसम्मको झण्डै १६ किलोमिटर सडकका २० भन्दा बढी स्थानमा पहिरोले क्षति पुर्‍याएको गल्छी–त्रिशूली–मैलुङ–स्याफ्रुबेशी सडक सुधार आयोजना प्रमुख कृष्णनाथ ओझाले जानकारी दिनुभयो। गत असार र साउन महिनामा बाढी–पहिरोका कारण सडक अवरुद्ध भएपछि भर्खरै मर्मत गरेर सञ्चालनमा आएको थियो। तर हालको अविरल वर्षाले पुनः तेस्रो पटक सडक अबरुद्ध बनेको हो। यससँगै ल्हेन्दे खोलामा निर्माणाधीन मितेरी पुल धमाधम निर्माण भइरहेको छ। तिहारसम्म बेलिब्रिज तयार हुने अपेक्षा गरिएको छ।
गत असार २४ गतेको बाढीले सो पुल बगाएपछि नेपाल–चीन नाका पनि बन्द भएको थियो।