जनतापत्र, स्याउले ।
स्याउलेमा निशुल्क स्वस्थ्य शिविर सम्पन्न भएको छ । उक्त शिविर
चौतारा साँगाचोकगढी नगरपालिका स्वास्थ्य शाखाको आयोजनामा आइताबार भएको हो । पाठेघरको मुखको क्यान्सर सम्बन्धि प्रारम्भिक जाँच एवं मोतियाविन्दु (आँखा सम्बन्धि ) १ दिने स्वास्थ्य शिविर वडा नं १ स्थित स्याउले स्वास्थ्यचौकीमा सम्पन्न भएको थियो ।

उक्त शिविरमा १ सय ७८ जना वडाबासिहरुले सेवा लिएका मध्ये महिला १ सय ५५ जना र पुरुष २३ जना रहेका थिए ।
शिविरमा पाठेघरको मुखको क्यान्सर सम्बन्धि प्रारम्भिक जाँच ९१ जनाले गरेका भने १२ जना महिलाहरुमा आङ खस्ने समस्या देखिएको छ ।
आँखा परीक्षणमा १९ जनालाई मोतियाविन्दु भएको पाइएको जनस्वास्थ्य अधिकृत दिनेश नेपालले बताउनुभयो । यीमध्ये पनि ६ जनाको दुवै आँखामा मोतियाविन्दु भएको पाइएको छ ।
त्यस्तै चौतारा साँगाचोक गढी नगरपालिका वडा नं ७, आरुबोटेमा ५० जनाको आँखा परिक्षण गरिएको छ । तामाङ समुदायको बाक्लो बस्ति रहेको यस गाउँमा १६ जनाको आँखामा मोतियाविन्दु भएको पाइएको छ । उनिहरुलाई आइताबार नगरपालिकाको स्वास्थ्यकर्मीहरुले घर आँगनमाने पुगेर सेवा दिएका थिए । साथै शिविरमा सुगर, प्रेसर जाँच पनि गरिएको थियो ।

चौतारा साँगाचोकगढी नगरपालिकाका मेयर कृष्ण प्रसाद सापकोटाले मोतियाविन्दु भएकाहरुलाई नगरपालिकाले आयोजना गर्न लागेको निशुल्क मोतियाविन्दु शल्यक्रिया शिविरमा सेवा लिन आग्रह गरे ।