जनतापत्र,सोलुखुम्बु ।

सोलुखुम्बुको लुबुचे क्षेत्रमा बुधबार बिहान अल्टिच्युट एयरको हेलिकप्टर दुर्घटना भएको छ। उद्धारका लागि काठमाडौंबाट गएको सो हेलिकप्टर ल्याण्ड गर्ने क्रममा चिप्लिएर दुर्घटनामा परेको सोलुखुम्बुकी प्रमुख जिल्ला अधिकारी लिलाकुमारी केसी पाण्डेले जानकारी दिइन्। उनका अनुसार दुर्घटनाग्रस्त हेलिकप्टरमा कुनै यात्रु नरहेका थिए। पाइलटलाई भने सकुशल उद्धार गरिएको छ। दुर्घटनापछि उद्धार टोली घटनास्थलमा पुगेको र पाइलटलाई प्रारम्भिक स्वास्थ्य परीक्षणका लागि सुरक्षित स्थानमा ल्याइएको जिल्ला प्रशासन कार्यालय सोलुखुम्बुले जनाएको छ। अल्टिच्युट एयरको यो हेलिकप्टर काठमाडौंबाट लुक्ला हुँदै लुबुचे क्षेत्रतर्फ उद्धार कार्यका लागि गएको थियो। सो क्रममा उच्च हिमाली क्षेत्रमा रहेको हावाको वेग र अवतरण स्थलको कठिन भौगोलिक अवस्थाका कारण दुर्घटना भएको प्रारम्भिक अनुमान गरिएको छ। दुर्घटनाबाट हेलिकप्टरमा क्षति पुगेको बताइए पनि मानवीय क्षति नभएको बताएको छ ।