जनतापत्र,भोटेकोशी सिन्धुपाल्चोक ।
माथिल्लो भोटेकोशी जलविद्युत आयोजनाले स्थानीयलाई सेयर नदिएको विषयले फेरि उग्र रूप लिँदै गाउँपालिका कार्यालयमै तोडफोड भएको छ। १० दिनदेखि बन्द रहेको ४६ मेगावाट क्षमताको पावरहाउस पुनः सञ्चालन गर्न कम्पनीले पालिका अध्यक्ष पासाङ नुर्पु शेर्पा र जनप्रतिनिधिसँग मात्र छलफल गरेको थाहा पाएपछि आन्दोलनरत स्थानीय आक्रोशित बनेका थिए। आफूहरूलाई बेवास्ता गर्दै “गुपचुप सम्झौता गर्ने प्रयास भएको” भन्दै उनीहरू पालिका भवनमा नाराबाजीसहित प्रवेश गरेका थिए। विवाद चर्कँदै जाँदा स्थानीयले ढुंगामुढा गर्दै भवनमा क्षति पुर्‍याए। स्थिति नियन्त्रणबाहिर जाँदा बैठक स्थल छोडेर जनप्रतिनिधि र हाइड्रोपावरका प्रतिनिधि भाग्न बाध्य भएका थिए। धकेलाधकेलका बीच दुई जना सामान्य घाइतेसमेत भएका छन्। स्थानीयले करिब दुई दशकदेखि सञ्चालनमा रहेको माथिल्लो भोटेकोशीले कानुनअनुसार आफूहरूलाई उपलब्ध हुनुपर्ने सेयर नदिएको गुनासो गर्दै आएका छन्। यही विषयमा पटक–पटक तनाव हुने गरे पनि समाधान नआएको कारण आन्दोलन फेरि तीव्र बनेको हो।