जनतापत्र, सिन्धुपाल्चोक, । नेपाल कम्युनिस्ट पार्टी (एमाले) सुनकोशी गाउँपालिकामा आयोजित जनभेला सम्पन्न भएको छ। कार्यक्रममा एमालेका केन्द्रीय सदस्य तथा जिल्ला इन्चार्ज सरेश नेपाल प्रमुख अतिथि रहेका थिए भने गाउँपालिकाका अध्यक्ष तथा एमाले वाग्मति प्रदेश सदस्य टपेन्द्र तिमिल्सिना विशेष अतिथि रहेका थिए।
कार्यक्रममा सहभागी जनसमूहलाई सम्बोधन गर्दै नेता सरेश नेपालले एमाले जनताको वास्तविक पार्टी भएको उल्लेख गरे। उनले हाल देशमा बढ्दै गएको अपराध, भ्रष्टाचार र अराजकतामाथि कडा प्रहार गर्न एमाले प्रतिबद्ध रहेको बताए। उनका अनुसार, “जेन्जी” आन्दोलनको नाममा भइरहेको भ्रामक प्रचार र देशविरोधी गतिविधिहरूले राष्ट्रिय अखण्डतालाई कमजोर बनाउने प्रयास भइरहेको छ, जसको विरोधमा एमाले दृढतापूर्वक उभिनेछ।

नेता नेपालले थपे, “सत्य र न्यायका पक्षमा अडिने नै साँचो नेतृत्व हो। हामी कुनै दबाब वा धम्कीबाट पछि हट्ने छैनौं। देश र जनताको पक्षमा उभिने आन्दोलन नै हाम्रो लक्ष्य हो।” उनले कार्यकर्तालाई संगठन सुदृढीकरण, जनसंपर्क विस्तार र भ्रष्ट्राचारविरोधी अभियानमा सक्रिय हुन आह्वान गरे।

कार्यक्रमका विशेष अतिथि टपेन्द्र तिमिल्सिनाले एमाले सधैं राष्ट्रियता, जनजीविका र विकासका सवालमा अग्रपंक्तिमा रहेको पार्टी भएको बताए। उनका अनुसार देश आर्थिक र राजनीतिक रूपमा कठिन अवस्थामा भए पनि एमालेले जिम्मेवार नेतृत्वको भूमिका खेलिरहेको छ।
तिमिल्सिनाले भने, “हामी जनताको दुःख बुझ्ने र समाधान खोज्ने पार्टी हौं। एमालेको मूल नीति देश विकास र सुशासन हो, र त्यसका लागि गाउँदेखि केन्द्रसम्मको एकता आवश्यक छ।”

कार्यक्रमको अध्यक्षता गरेका रामही खड्काले एमालेको ‘सुखी नेपाली, समृद्ध नेपाल’ अभियानलाई व्यवहारमा उतार्ने प्रतिबद्धता व्यक्त गरे। उनले भने, “एमाले सधैं देशभक्त, जनप्रेमी र क्रान्तिकारी शक्तिको रूपमा रहन्छ। जस्तोसुकै चुनौती आए पनि हाम्रो यात्रा जनताको पक्षमै हुनेछ।”

जनभेलामा स्थानीय जनप्रतिनिधि, पार्टी कार्यकर्ता र सर्वसाधारणको उल्लेख्य सहभागिता थियो। वक्ताहरूले जनताको बीचमा राजनीतिक भ्रम फैलाउने प्रयासको विरोध गर्दै, पार्टीको नीति, उद्देश्य र भविष्यका योजनाबारे जानकारी दिएका थिए।
एमालेका नेताहरूका अनुसार हाल देशभरका ७५३ स्थानीय तहमा एकैसाथ जनभेला कार्यक्रम सञ्चालन भइरहेको छ। भदौ महिनाको “जेन्जी आन्दोलन” पछि उत्पन्न भ्रम र असन्तुष्टिलाई चिर्ने, तथा पार्टी र जनताको सम्बन्धलाई अझ बलियो बनाउने लक्ष्यसहित जनभेला आयोजना गरिएको हो।
कार्यक्रमका अन्त्यमा एमालेले संसद् पुनःस्थापना, भ्रष्टाचार नियन्त्रण, सुशासन प्रवद्र्धन र आगामी निर्वाचनका तयारीलाई प्राथमिकता दिने निर्णय सार्वजनिक गरेको थियो। पार्टीका अनुसार, अबको बाटो राष्ट्रिय स्वाभिमान, पारदर्शिता र विकासमुखी राजनीतिक अभ्यासमा केन्द्रित हुनेछ।