आइसिँ तामाङ,चौतारा, सिन्धुपाल्चोक ।
चौतारा साँगाचोकगढी नगरपालिकाले सार्वजनिक जग्गा बाँझो नरहोस् भनेर एउटा उदाहरणीय काम थालेको छ। अब सल्लाले सुकेको बन्जर जमिनमा फलफूलका बिरुवा रोपिँदैछ।
चौतारा साँगाचोकगढी नगरपालिका–११ नम्बर वडामा हालै सुरु गरिएको अभियान अन्तर्गत आँप, लिची, अम्बा, कागती, सुन्तला, नास्पाती, जामुन, अन्जिर, गुलाब जामुन, एभोकाडोजस्ता १२ भन्दा बढी प्रजातिका फलफूलका ४ हजार ५ सयभन्दा धेरै बिरुवा रोप्ने तयारी छ।
वडाध्यक्ष रोशनराज गिरीका अनुसार सार्वजनिक वन, चौर, कार्यालयका खुला ठाउँहरूमा यी बिरुवा रोपिने छन्। निजी खेतबारीमा लैजान चाहने किसानले भने सार्वजनिक ठाउँमा कम्तीमा एक बिरुवा रोप्नुपर्ने नियम बनाइएको छ। बिरुवा वितरण शान्ति सेवा गृहको सहयोगमा गरिएको हो भने बिरुवाहरू ग्राफ्टिङ प्रविधिबाट उत्पादन गरिएका छन्।