जनतापत्र, सिन्धुपाल्चोक

सिन्धुपाल्चोकको चौतारा स्पोर्टिङ क्लबले सहिद स्मारक ‘सी’ डिभिजन लिग छनोटका लागि नियमित प्रशिक्षण सुरु गरेको छ। गत बुधबारदेखि बसन्तपुर खेलमैदान, लामोसाँघुमा टोलीले अभ्यास गर्दै आएको क्लबले जनाएको छ।

गत बैशाखमा सम्पन्न जिल्ला लिगमा विजेता बनेको चौताराले सोही टोलीका स्थानीय खेलाडीहरूलाई प्राथमिकता दिँदै नयाँ संयोजनमा टिम तयार पारेको छ। प्रशिक्षक सरोज भुजेलका अनुसार जिल्लाभित्रका प्रतिभाशाली खेलाडीलाई अनुबन्धन गरेर प्रतियोगितामा राम्रो प्रदर्शन गर्ने लक्ष्य राखिएको छ।

चौतारा मिनी रंगशाला निर्माणाधीन अवस्थामा रहेकाले टोलीले लामोसाँघुस्थित जिल्ला फुटबल संघको मैदानलाई अभ्यासस्थल बनाएको छ। हाल क्लबले बिहान ८ देखि ११ र दिउँसो ३ देखि ५ बजेसम्म दुई सत्रमा नियमित प्रशिक्षण गरिरहेको छ।

आइतबारसम्म टोलीले तयारीको पाँचौँ दिन पूरा गरेको क्लब स्रोतले जनाएको छ।