सिन्धुपाल्चोकको प्रमुख पर्यटकीय क्षेत्र सुकुटेमा सक्रिय सिन्धु सुकुटे पर्यटन व्यवसायी संघले साउन ४ गते एक पत्रकार सम्मेलनको आयोजना गर्दै, पछिल्लो समय पर्यटन व्यवसायमा देखिएका चुनौती, समस्याहरू र विकास प्रयासका बारेमा विस्तृत रूपमा जानकारी दिएको छ।
संघका सचिव कृष्ण सापकोटाद्वारा प्रस्तुत गरिएको प्रेस वक्तव्यमा सिन्धुपाल्चोकको पर्यटन विकासमा सुकुटे करिडोरको भूमिका र योगदानका साथै व्यवसायीहरूले भोग्नुपरेको अन्यायप्रति गम्भीर ध्यानाकर्षण गरिएको छ। उनले सुकुटे क्षेत्रलाई व्यवस्थित रूपमा पर्यटन गन्तव्यको रूपमा विकास गर्न संघले सञ्चालन गर्दै आएको गतिविधिहरूको जानकारी पनि गराएका थिए।
सुकुटेको पर्यटन सम्भावना र संघको भूमिका
सिन्धुपाल्चोक जिल्ला राजधानी काठमाडौंको नजिकै रहेको, प्राकृतिक सम्पदाले भरिएको जिल्ला हो। यहाँको जलवायु, भौगोलिक बनावट, नदी र जंगलका दृश्यले पर्यटकलाई आकर्षण गर्छ। विशेषतः बलेफी गाउँपालिका, चौतारा साँगाचोकगढी नगरपालिका र सुकुटे करिडोर जस्ता क्षेत्रहरूमा साहसिक पर्यटनका राम्रो सम्भावना रहेको छ।
यिनै सम्भावनालाई उजागर गर्न सिन्धु सुकुटे पर्यटन व्यवसायी संघ गठन गरिएको हो। संघले स्थापना कालदेखि नै पर्यटन प्रवद्र्धनमा ध्यान केन्द्रित गर्दै विभिन्न कार्यक्रमहरू गर्दै आएको छ।
२०८१ माघ १ गतेदेखि ५ गतेसम्म सुकुटे करिडोरमा सम्पन्न सातौं महिला तथा आठौं पुरुष राष्ट्रिय बीच भलिबल प्रतियोगिता संघको संयोजनमा सम्पन्न भएको थियो, जसले सुकुटेलाई राष्ट्रियस्तरमा चिनाउन सघायो। त्यस्तै, संघले सुकुटे पर्यटन दिवस मनाउने परम्पराको थालनी पनि गरिसकेको छ।
संघका अनुसार चौतारा साँगाचोकगढी नगरपालिकाको लगानीमा सुकुटे करिडोरमा फुटपाथ, सडक बत्ती, चौतारी निर्माणको काम भइरहेको छ, र आगामी वर्षमा पनि पर्यटन पूर्वाधार निर्माणलाई निरन्तरता दिने योजना छ।
पर्यटन विकास र रोजगारीमा योगदान
सुकुटे क्षेत्रका होटल तथा रिसोर्टहरूले स्थानीय सरकारदेखि केन्द्रसम्म ठूलो कर राजस्व बुझाउँदै आएको संघको दाबी छ। केही रिसोर्टहरूले मात्र लाखौं रुपैयाँ कर तिरेका प्रमाण प्रस्तुत गरिएको छ।यस क्षेत्रका रिसोर्टहरूले प्रत्यक्ष रूपमा करिब ३०० जनालाई रोजगारी दिएका छन् भने अप्रत्यक्ष रोजगारीको संख्या त्योभन्दा अझ धेरै रहेको संघले उल्लेख गरेको छ। यसबाट स्थानीय जनताको आय आर्जनमा सकारात्मक प्रभाव परेको र पर्यटन नै स्थानीय अर्थतन्त्रको मेरुदण्ड बन्ने सम्भावना रहेको विश्वास संघले व्यक्त गरेको छ।
प्राकृतिक प्रकोप र त्यसको असर
सुकुटे पर्यटन क्षेत्र पछिल्लो समयमा प्राकृतिक प्रकोपबाट धेरै प्रभावित भएको छ। विशेषतः २०८१ सालको असोज १२ र १३ गतेको अविरल वर्षापछि आएको बाढी र पहिरोले सुकुटे क्षेत्रमा रहेका करिब दर्जनभन्दा बढी रिसोर्टहरूमा करोडौंको क्षति पुर्याएको छ।
सिन्धु बीच रिसोर्ट, सुनकोशी बीच रिसोर्ट लगायत अन्य व्यवसायहरू अहिले पनि पूर्ण रूपमा सञ्चालनमा फर्किन सकेका छैनन्। व्यवसायमा लय गुम्दा रोजगार, आम्दानी र पर्यटकीय आवागमन सबै प्रभावित भएको संघको भनाइ छ।
व्यवसायीहरूमाथि भैरहेका आरोपप्रति आपत्ति
संघले पत्रकार सम्मेलनमा पछिल्लो समयमा सञ्चारमाध्यम तथा केही व्यक्तिहरूको उक्साहटमा भ्रामक प्रचार र झूटा आरोप लगाइएका घटनाप्रति कडा आपत्ति जनाएको छ।
संघका अध्यक्ष महेन्द्रसिंह थापा, जो सुकुटेलाई पर्यटकीय गन्तव्यको रूपमा चिनाउने अभियान्ता मध्येका एक हुन्, उनीमाथि सार्वजनिक जग्गा अतिक्रमण गरेको भन्ने आरोपहरु विभिन्न माध्यमबाट लगाइएको छ।
संघका अनुसार सुकुटे बीच रिसोर्ट सञ्चालनमा रहेको जग्गा स्थानीय सरकारसँग सम्झौता गरी नियमित रूपमा कर र भाडा तिरेर उपयोगमा ल्याइएको हो, जुन कानुनी रूपमा वैध रहेको स्पष्ट प्रमाणहरू छन्। त्यसबाहेक जिल्ला प्रशासन कार्यालय र नगरपालिका स्वयंले निरीक्षण गरेर समेत त्यस क्षेत्रमा गैरकानुनी कार्य नभएको स्पष्ट पारेको संघले उल्लेख गरेको छ।यति हुँदाहुँदै पनि व्यक्तिगत रिसी र प्रतिस्पर्धाको आधारमा अध्यक्ष थापामाथि बारम्बार आरोप लगाइनु, सञ्चार माध्यमहरू प्रयोग गरेर झूटा प्रचार गर्नु र यसले समग्र पर्यटन व्यवसायमाथि नकारात्मक प्रभाव पार्नु गम्भीर चिन्ताको विषय भएको संघले जनाएको छ।
त्यस्तै, सुनकोशी बीच रिसोर्टका सञ्चालक अन्जान खड्कामाथि अख्तियार दुरुपयोग अनुसन्धान आयोगमा झूटा उजुरी दिइएको, र माया बीच रिसोर्ट तथा स्याण्डी बीच रिसोर्ट लगायतका संस्थाहरूमाथि पनि निराधार उजुरीहरू परेका कुराले संघलाई गम्भीर रूपमा असर पारेको छ।
संस्थाको ऐक्यबद्धता र आग्रह
सिन्धु सुकुटे पर्यटन व्यवसायी संघले स्पष्ट रूपमा भनेको छ कि, “व्यवसायीमाथि भएको अन्याय सबै व्यवसायीको साझा मुद्दा हो।” संघले सबै पर्यटन व्यवसायीलाई एउटै छातामुनि एकीकृत गरी अगाडि बढेको बताउँदै, कुनैपनि व्यवसायी अन्यायमा पर्दा त्यो संघकै साझा पीडा हुने उल्लेख गरेको छ।
पत्रकार सम्मेलनको अन्त्यमा संघले मिडियाकर्मीहरूलाई सत्य तथ्य उजागर गर्न आह्वान गर्दै, सुकुटे करिडोरलाई सकारात्मक रूपमा प्रवद्र्धन गर्न अनुरोध गरेको छ। साथै सम्बन्धित निकायलाई छानबिन गरी सत्य र तथ्यमा आधारित निर्णय गर्न अपिलसमेत गरिएको छ।
सुकुटे जस्तो पर्यटकीय सम्भावना बोकेको क्षेत्रलाई व्यवस्थित गर्न संघले विगतदेखि खेलेको भूमिका प्रशंसनीय छ। यस्ता संस्थाहरूलाई प्रोत्साहन गर्नु र व्यावसायिक वातावरणमा निहित स्वार्थ वा गलत आरोपहरूको अन्त्य गर्नु नै दीर्घकालीन पर्यटन विकासको आधार बन्न सक्छ। संघले प्रस्तुत गरेको यो प्रेस वक्तव्यले पर्यटन विकासमा निजी क्षेत्रको भूमिका, चुनौती र सम्भावनाका विषयमा गहन सन्देश दिएको छ। अब जिम्मेवारी सम्बन्धित निकाय, सञ्चार माध्यम र आम नागरिकको पनि हो – सत्यको साथ दिनु र सुकुटे पर्यटनको उज्यालो भविष्य सुनिश्चित गर्नु रहेको छ ।

पर्यटन व्यवसायीहरुले गरेका राम्रा कामहरु

१)  सकारात्मक प्रचार गर्ने को जोड दिने 

२) यस सुकुटे करिडोरमा संचालित रिसोर्ट होटल एक नेपाल को प्रचलित कानून को अधिनमा रहि व्यापार व्यवसाय संचालन गर्दै आई रहेको ।
३) व्यापार व्यवसाय गर्दा राज्य का बिभिन्न निकायमा कर हरु बुझाउदै आएको ।
४) स्थानिय तह (चौ.सा.न.पा) लाई बिच प्रयोग गरे बापत बार्षिक बाल बिरोट कर बुझाउदै आएको र यस क्षेत्रमा भित्रिनी आन्तरिक तथा बाहिरी पर्यटन बाट प्रति पर्यटन बापत रु १०० को दरले बुझाउदै आएको ।
५) प्रत्येक वर्ष वर्षायाममा बाढि पहिरोले गर्दा नदि तटिय क्षेत्रमा संचालित व्यवसाय हरु को भौतिक संरचनाहरुमा बर्षेनीक्षेती भैरहेकाले क्षेती न्यूनिकरण गर्नको लागि सम्बन्धित निकाय ले पहल गर्नु पर्ने हामीले माग उठाउदै आएको ।
६) विपद व्यवस्थापन मा यस करिडोर मा हरुले संचालित रिसोर्ट होटल ब्यवसायहरुले, सहयोग गर्द आई रहेको ।
७) स्थानिय स्तरमा स्थानिय कृषि उपज, आय आर्जन वृद्धि, रोजगार सृजना गर्दै आई रहेको ।
८) स्थानिय सामाजिक संघ संस्थामा आर्थिक तथा सामाजिक उत्तर दायित्व वहन गर्दै आई रहेको ।
९) नेपालको साहसिक पर्यटन गेम जस्त राफटिङ क्यानोनिङ बन्जी, जिप लाईन, स्काई साईकिलिङ, ट्रेकिङ विकासमा सहयोग गर्दै आई रहेको ।
१०) सुकुटे क्षेत्र लाई केन्ल्र बनाई जिल्लामा अवस्थित धार्मिक, प्राकृतिक, स्थानिय संस्कृति पर्यटन प्रर्वद्धनमा जोड दिने पूर्वधारहरु निमार्णको क्रम जारी छ ।
यस सुकुटे कटिडोरमा संचालित रिपोर्ट तथा होटलहरु लाई सार्वजनिक जग्गा मिच्यो भनेर गलत प्रचार वाजीहरु गर्दै आई रहेका छन् पर्यटन व्यावसायीहरु लाई उपराधी लाई जस्तै व्यवहार गर्दै आई रहेका छन्, केहि मिडियाका साथीहरु केही यसै क्षेत्रमा लागेका साथीहरुले हामिले गरेका कामको सत्य तथ्य हिन समाचार बनाई सुकुटे करिडोर लाई नै वदनाम गराउन लागि परीरहनु भएको छ यहा उपस्थित हुनु भएका मिडिया साथीहरुलाई सत्य तत्यमा टेकेर सकारात्म प्रचार गरी दिन अनुरोध व्यवशायीहरुले अनुरोध गरेका छन् ।