जनतापत्र, सिन्धुली |

सिन्धुली जिल्लाको दुधौली नगरपालिका–४ लक्ष्मीपुरस्थित मदनभण्डारी लोकमार्गमा बुधवार दिउँसो तीनवटा सवारी एकआपसमा ठोक्किँदा दुईजनाको मृत्यु भएको छ भने चार जना घाइते भएका छन्।

दुर्घटनामा परेर दुधौली नगरपालिका–११ टाडीका ३४ वर्षीय रामकुमार कुमर र दुधौली नगरपालिका–३ का २५ वर्षीय फुलबाबु धामीको मृत्यु भएको जिल्ला प्रहरी कार्यालय, सिन्धुलीले जनाएको छ। गम्भीर घाइते दुवै जनाको उपचारका क्रममा दुधौली नगर अस्पताल सिर्थौलीमा मृत्यु भएको हो।

इलाका प्रहरी कार्यालय डकाहाका प्रमुख प्रहरी निरीक्षक सपना खड्काका अनुसार दुर्घटनामा दुधौली–३ का २६ वर्षीय विप्लव धामी, २७ वर्षीय बुद्धि थारू, २५ वर्षीय सुनिल माझी र ३२ वर्षीय कुशे धामी घाइते भएका छन्। तीमध्ये विप्लव, बुद्धि र कुशेको अवस्था गम्भीर रहेको बताइएको छ।

भिमानबाट दुधौलीतर्फ गइरहेको प्रदेश १–०२–००२ ख ४११ नम्बरको ट्रक र विपरीत दिशाबाट आउँदै गरेको प्रदेश २–०१–००१ प २१४२ नम्बरको मोटरसाइकल तथा मप्र.०२–००६ प ५८४१ नम्बरको पल्सर मोटरसाइकल आपसमा ठोक्किँदा दुर्घटना भएको हो।

दुर्घटनापछि मप्र.०२–००६ प ५८४१ नम्बरको मोटरसाइकलमा आगलागी भई सो सवारी पूर्णरूपमा क्षतिग्रस्त भएको प्रहरीको भनाइ छ। घटनापछि ट्रक र चालकलाई प्रहरीले नियन्त्रणमा लिएको छ।