जनतापत्र, सिन्धुपाल्चोक ।

प्राकृतिक स्रोत द्वन्द्व रूपान्तरण केन्द्र नेपालको आयोजनामा सिन्धुपाल्चोक जिल्ला स्तरीय संवाद तथा सल्लाकार समितिको बैठक जिल्ला समन्वय समितिका प्रमुख बालकृष्ण श्रेष्ठको अध्यक्षतामा सम्पन्न भयो। बैठकमा जिल्लास्थित सरकारी तथा गैरसरकारी कार्यालयका प्रमुख तथा प्रतिनिधिहरूको सक्रिय उपस्थिति थियो।

बैठकलाई सम्बोधन गर्दै जिल्ला समन्वय समितिका प्रमुख श्रेष्ठले स्थानीय तहमा न्यायिक समितिको सहयोगीका रूपमा खटिने जिम्मेवारी केवल औपचारिक कार्य नभई, समुदायमा शान्ति, सहअस्तित्व र न्याय सुनिश्चित गर्ने अत्यन्त संवेदनशील र महत्वपूर्ण दायित्व भएको बताए। उनले प्राकृतिक स्रोत द्वन्द्व रूपान्तरण केन्द्र नेपालले स्थानीय तहहरूमा शान्ति निर्माणका क्षेत्रमा गरेका गतिविधि, सिकाइ र उपलब्धि उल्लेखनीय रहेको उल्लेख गर्दै आजको छलफलले आगामी दिनमा अझ प्रभावकारी रणनीति तय गर्न मद्दत पुग्ने विश्वास व्यक्त गरे।

चौतारा साँगाचोकगढी नगरपालिकाका उपप्रमुख सिता थापाले संस्थाले सञ्चालन गरेको गतिविधि सराहनीय रहेको बताउँदै नगरपालिकाबाट आवश्यक सहयोग निरन्तर रहने प्रतिवद्धता जनाइन्।

यसैगरी प्रमुख जिल्ला अधिकारी बन्धुप्रसाद बास्तोलाले शान्ति निर्माण कुनै एक पक्ष वा संस्थाको मात्र काम नभई सामूहिक प्रयासको परिणाम हुने बताए। स्थानीय तह, न्यायिक समिति, नागरिक समाज, सामुदायिक संस्था, महिला समूह, युवा नेतृत्व तथा स्थानीय प्रहरी सबैको समन्वित भूमिकाले मात्र समुदायमा स्थायी शान्ति स्थापित हुन सक्ने उनको भनाइ थियो।

बैठकमा संस्थाको परिचय तथा हालसम्मका गतिविधिबारे क्षेत्रीय संयोजक रिता मानन्धरले प्रस्तुति दिँदै समग्र कार्यक्रमको प्रगति र आगामी योजनाबारे जानकारी गराएकी थिइन्। प्राकृतिक श्रोत द्वन्द्व रुपान्तरण केन्द्र नेपालले बहुसरोकारवाला विवादमा काम गरिरहेको छ । मेलमिलाप सम्बन्धी ऐन २०६८, नियमावली २०७०, साथै नेपालको संविधानको धारा २१७ अन्तर्गत व्यवस्था गरिएको न्यायिक समितिको काम, दायित्व र उद्देश्यलाई मध्यनजर गर्दै, प्राकृतिक स्रोत द्वन्द्व रूपान्तरण केन्द्र नेपालले सिन्धुपाल्चोक जिल्लामा काम गर्दै आएको हो ।
सिन्धुपाल्चोक जिल्लामा हालसम्म विभिन्न चरणमा ३३ वटा भन्दा बढी बहुसरोकारवाला विवादमा काम गरिएको छ । संस्थाले आठौँ चरणमा मात्र ५ वटा विवादलाई रुपान्तरण गरेको छ भने २ वटा विवादमा काम भइरहेको संस्थाका राष्टियश्रोत व्यक्ति नेत्रप्रसाद धितालले जानकारी दिनुभयो ।