जनतापत्र, सिन्धुपाल्चोक ।- सिन्धुपाल्चोक जिल्लाको चौतारा साँगाचोकगढी नगरपालिका–४ कुविण्डेमा निर्माण गरिएको आधुनिक शीत भण्डार सञ्चालनमा आएपछि स्थानीय कृषकहरूलाई ठूलो राहत पुगेको छ। संघ, प्रदेश र स्थानीय तहको संयुक्त लगानीमा करिब १० करोड रुपैयाँको लागतमा निर्माण गरिएको उक्त शीत भण्डार ३३० टन क्षमता भएको संरचना हो। हाल प्रारम्भिक चरणमै करिब १६५ टन आलु भण्डारण गरिएको सम्बन्धित पक्षले जनाएको छ।
यस क्षेत्रका कृषकहरूले लामो समयदेखि उत्पादन भएको आलु तथा तरकारी सुरक्षित राख्ने पूर्वाधारको अभाव झेल्दै आएका थिए। बजारमा एकैपटक धेरै उत्पादन आउँदा मूल्य घट्ने र भण्डारणको व्यवस्था नहुँदा ठूलो परिमाणमा उत्पादन नोक्सान हुने समस्या सामान्यजस्तै बनिसकेको थियो। शीत भण्डार सञ्चालनमा आएपछि अब उत्पादन सुरक्षित राखेर आवश्यक समयमा बिक्री गर्न सकिने अवस्था बनेको कृषकहरूले बताएका छन्।
स्थानीय कृषकहरूका अनुसार उत्पादन सुरक्षित राख्न सकिने भएपछि खेतीप्रति उत्साह बढेको छ। विशेषगरी आलु उत्पादनमा सक्रिय कृषकहरूका लागि यो संरचना निकै उपयोगी सावित हुने विश्वास गरिएको छ। उत्पादनलाई लामो समयसम्म सुरक्षित राख्न सकिने भएकाले बजार मूल्य अनुकूल भएको बेला बिक्री गर्न सकिने अवसर प्राप्त हुने अपेक्षा गरिएको छ। यसले कृषकहरूको आम्दानी स्थिर बनाउन मद्दत पुग्ने स्थानीयहरूको भनाइ छ।
नगर प्रमुख कृष्णप्रसाद सापकोटा ले शीत भण्डार सञ्चालनसँगै कृषकहरूको उत्पादन संरक्षण तथा बजार व्यवस्थापनमा सकारात्मक परिवर्तन आउने विश्वास व्यक्त गरेका छन्। उनका अनुसार कृषि क्षेत्रमा पूर्वाधार विकासलाई प्राथमिकतामा राख्दै नगरपालिका अघि बढिरहेको छ। यस्ता संरचनाले कृषकलाई उत्पादनपछि हुने नोक्सानी कम गर्न सहयोग पुग्ने र स्थानीय अर्थतन्त्र सुदृढ बनाउन टेवा पुग्ने अपेक्षा गरिएको छ।
त्यस्तै, कुविण्डे सहकारीका अध्यक्ष प्रेम प्रसाद सापकोटा ले शीत भण्डार सञ्चालन भएपछि सहकारीमार्फत कृषकहरूलाई व्यवस्थित सेवा उपलब्ध गराउने तयारी गरिएको जानकारी दिएका छन्। सहकारीको समन्वयमा भण्डारण सेवा सञ्चालन हुँदा कृषकहरूलाई सहज पहुँच हुने र लागत व्यवस्थापनमा समेत सहयोग पुग्ने उनले बताए। साथै उत्पादन व्यवस्थापनलाई थप व्यवस्थित बनाउन सहकारी सक्रिय रहने उनको भनाइ छ।
कुविण्डे क्षेत्र आलु उत्पादनका हिसाबले सम्भावनायुक्त क्षेत्रका रूपमा चिनिँदै आएको छ। यहाँ उत्पादन हुने आलु जिल्लाभित्र मात्र नभई बाहिरी बजारसम्म पनि आपूर्ति हुँदै आएको छ। अब शीत भण्डार सञ्चालनमा आएसँगै उत्पादनको गुणस्तर जोगाउँदै बजार व्यवस्थापन गर्न थप सहज हुने अपेक्षा गरिएको छ। यसले कृषि व्यवसायलाई व्यावसायिक र व्यवस्थित बनाउन सहयोग पुग्ने स्थानीय सरोकारवालाहरूको विश्वास छ।
स्थानीय तह, प्रदेश सरकार र संघीय सरकारको सहकार्यमा निर्माण गरिएको यस प्रकारको कृषि पूर्वाधारले ग्रामीण क्षेत्रको उत्पादन प्रणालीलाई सुदृढ बनाउन महत्वपूर्ण योगदान दिने देखिएको छ। दीर्घकालीन रूपमा यसले कृषकहरूको आयस्तर वृद्धि, कृषि उत्पादनको विस्तार तथा स्थानीय रोजगारी सिर्जनामा सकारात्मक प्रभाव पार्ने अपेक्षा गरिएको छ।
८ चैत्र २०८२, आईतवार ०७:४२
