जलनतापत्र,सिन्धुपाल्चोक
आर्थिक वर्ष २०८१र०८२ मा जिल्लाभर सञ्चालन भएका स्वास्थ्य कार्यक्रमहरूको वार्षिक समीक्षा कार्यक्रम सम्पन्न भएको छ। जनस्वास्थ्य कार्यालय सिन्धुपाल्चोकको आयोजनामा जिल्ला समन्वय समितिको सभा हलमा भएको कार्यक्रममा जिल्लाका सबै स्थानीय तहहरूले आफ्नो क्षेत्रका उपलब्धि, नवीनतम पहल, समस्या तथा सिकाइका विषयमा प्रस्तुति दिएका थिए। जनस्वास्थ्य कार्यालयका प्रमुख दुर्गा बजगाईका अनुसार उत्कृष्ट काम गर्ने पालिकामध्ये पाँचपोखरी थाङपाल गाउँपालिका पहिलो, चौतारा साँगाचोकगढी नगरपालिका र सुनकोशी गाउँपालिका दोस्रो तथा त्रिपुरासुन्दरी गाउँपालिका तेस्रो स्थानमा चयन भएका छन्।

समीक्षा कार्यक्रममा विभिन्न पालिकाले फरक–फरक क्षेत्रमा उल्लेखनीय कार्य गरेका थिए। हेलम्बु गाउँपालिकाले जिरो होम डेलिभरी र नसर्ने रोग रोकथाम कार्यक्रम, सुनकोशी गाउँपालिकाले स्वस्थ बच्चा प्रतिस्पर्धा र स्वास्थ्य व्यवस्थापन सूचना प्रणाली, त्रिपुरासुन्दरी गाउँपालिकाले महामारी रोग नियन्त्रण, मेलम्ची नगरपालिकाले न्यूनतम सेवा मापदण्ड, र बाह्रबिसे नगरपालिकाले स्वास्थ्य व्यवस्थापन सूचना प्रणाली सम्बन्धी उत्कृष्ट कार्य प्रस्तुत गरेका थिए। त्यस्तै चौतारा साँगाचोकगढी नगरपालिकाले सुरक्षित मातृत्व कार्यक्रम र समुदायस्तरको विशेषज्ञ आँखा स्वास्थ्य सेवा, जुगल गाउँपालिकाले क्षयरोग कार्यक्रम, पाँचपोखरी थाङपाल गाउँपालिकाले स्वास्थ्य फोहोरमैला व्यवस्थापन, भोटेकोशी गाउँपालिकाले पोषण कार्यक्रम, इन्द्रावती गाउँपालिकाले सुरक्षित मातृत्व, बलेफी गाउँपालिकाले नवजात शिशु तथा बालरोगको एकीकृत व्यवस्थापन, र लिसंखुपाखर गाउँपालिकाले परिवार योजना कार्यक्रम तर्फ उत्कृष्टता देखाएका छन्। कार्यक्रममा जिल्ला समन्वय समितिका प्रमुख बालकृष्ण श्रेष्ठ, उपप्रमुख पदमनाथ नेपाल, चौतारा साँगाचोकगढी नगरपालिका उपप्रमुख सिता थापा, प्रमुख जिल्ला अधिकारी बन्धु प्रसाद बास्तोला, विषय विज्ञ अनिल थापा लगायतका सरोकारवालाको सहभागिता थियो। समीक्षाबाट प्राप्त उत्कृष्ट अभ्यास र सिकाइका बुँदाहरूलाई आगामी वर्षका योजना तथा नीतिमा समेत समेटिने जनाइएको छ।