जनतापत्र,सिन्धुपाल्चोक —

चौतारा साँगाचोकगढी नगरपालिका–८ इर्खुमा सामुदायिक वन दिवसको अवसरमा वृक्षारोपण कार्यक्रम सम्पन्न गरिएको छ। वातावरण संरक्षण र वन व्यवस्थापनमा स्थानीय समुदायको सक्रिय भूमिका सुनिश्चित गर्न आयोजित कार्यक्रममा स्थानीय निकायका प्रतिनिधि, सामुदायिक वन उपभोक्ता समूहका पदाधिकारी, वन कार्यालयका कर्मचारी तथा सरोकारवालाहरूको उल्लेखनीय उपस्थिति थियो।

यो कार्यक्रम सामुदायिक वन उपभोक्ता महासंघ नेपाल, सिन्धुपाल्चोकको आयोजनामा सम्पन्न भएको हो। कार्यक्रममा सब–डिभिजन वन कार्यालय चौतारा र वडा नं ८ कार्यालयको सहयोग तथा रानीपोखरी सामुदायिक वन उपभोक्ता समितिको सहकार्य रहेको थियो।

कार्यक्रमका प्रमुख अतिथि तथा वडा अध्यक्ष अमृत दंगालले वृक्षारोपण केवल औपचारिक कार्य नभई दीर्घकालीन उत्पादन र आयआर्जनको माध्यम बन्नुपर्नेमा जोड दिए। उनले वन उपभोक्ता समूहहरू सक्रिय रहे वनसँग सम्बन्धित उद्योग तथा आयआर्जनमूलक कार्यक्रम सञ्चालन गरी समुदायको आर्थिक सशक्तिकरण गर्न सकिने बताए।

महासंघका पूर्व केन्द्रीय सदस्य रामचन्द्र बस्नेत, बागमती प्रदेश सदस्य टिका सुवेदी, बागमती प्रदेशका पूर्व सदस्य नेत्र धिताल, डिभिजनल वन कार्यालय सिन्धुपाल्चोकका प्रतिनिधि रमेश दुलाल, सब–डिभिजनल वन कार्यालय चौताराकी कमला श्रेष्ठ, रानीपोखरी वन उपभोक्ता समूहका पदाधिकारीलगायत विभिन्न संघसंस्थाका प्रतिनिधिहरूले समेत उपस्थिति थियो। वक्ताहरूले सामुदायिक वनलाई केवल काठ, दाउरा वा घाँसको स्रोतका रूपमा मात्र नभई वातावरणीय सन्तुलन, माटो संरक्षण, पानीका स्रोतहरूको संरक्षण र पर्यटन विकाससँग पनि जोड्नुपर्नेमा जोड दिए।

कार्यक्रमको अध्यक्षता सामुदायिक वन उपभोक्ता महासंघका अध्यक्ष जनक गिरीले गरेका थिए। उनले सामुदायिक वन दिवसलाई केवल उत्सवको रूपमा नभई वनको महत्वबारे सचेतना जगाउने अवसरका रूपमा लिनुपर्ने बताए। कार्यक्रममा सञ्चालन कार्यक्रम संयोजक यज्ञ दंगालले गरेका थिए।

सामुदायिक वन दिवसकै अवसरमा भोलि इर्खु माध्यमिक विद्यालयमा “वातावरण संरक्षणका लागि समृद्ध वन व्यवस्थापनमा हाम्रो भूमिका” विषयक वक्तृत्वकला प्रतियोगिता हुने जानकारी महासंघकी जिल्ला सदस्य रन्जना श्रेष्ठले दिइन्। उक्त प्रतियोगितामा नगरभरका विद्यालयका विद्यार्थीहरू सहभागी हुनेछन्। प्रतियोगिताको उद्देश्य नयाँ पुस्तामा वन संरक्षण र वातावरणीय सचेतना बढाउनु रहेको छ।