टिका सुवेदी, सिन्धुपाल्चोक ।

असोज १७–२० गतेसम्म देशका विभिन्न भागमा भारी वर्षाको सम्भावना देखिएसँगै स्थानीय प्रशासन र सुरक्षा निकायले उच्च सतर्कता अपनाउन थालेका छन्। जल तथा मौसम विज्ञान विभागले आगामी दिनहरूमा भारी वर्षा हुने चेतावनी जारी गरेपछि जिल्ला प्रशासन कार्यालय सिन्धुपाल्चोकमा शुक्रबार विशेष संयुक्त बैठक बसेको थियो । बैठकमा सम्भावित विपद् न्यूनीकरण, राहत र उद्धार कार्यलाई प्रभावकारी बनाउने रणनीतिहरूमा विशेष ध्यान केन्द्रित गरिएको थियो।
बैठकले स्थानीय तह, सुरक्षा निकाय, गैरसरकारी संस्था, रेडक्रस, मानवसेवा संस्थाहरू, उद्योग–व्यापार संघलगायत सरोकारवाला सबै निकायबीच सहकार्य र समन्वयलाई बलियो बनाउने निष्कर्ष निकालेको छ। यस अन्तर्गत प्रत्येक निकायले आफ्नो भूमिका स्पष्ट रूपमा पहिचान गरी आपतकालीन अवस्था सामना गर्न तयारी रहने व्यवस्था मिलाइएको प्रमुख जिल्ला अधिकारी बन्धुप्रसाद बास्तोलाले जानकारी दिनुभयो ।
निर्णयअनुसार असोज १७ देखि २० गतेसम्म सिन्धुपाल्चोक जिल्लाभर उच्च सतर्कता कायम रहनेछ। यस अवधिमा प्रमुख जिल्ला अधिकारी, सहायक प्रशासनिक अधिकृत, प्रहरी, सशस्त्र प्रहरी र नेपाली सेनाका प्रमुखहरूले बिहान ६ बजेदेखि बेलुकी ६ बजेसम्म नियमित खटाइ व्यवस्थापन गर्नेछन्। यसले आपतकालीन स्थितिमा छिटो प्रतिक्रिया दिन सक्ने सुनिश्चितता दिनेछ ।
साथै, जोखिमयुक्त क्षेत्र र बस्तीमा विशेष गस्ती गर्ने व्यवस्था पनि गरिएको छ । स्थानीय प्रहरी, सशस्त्र प्रहरी र नेपाली सेनाले पहिरो, बाढी र डुबान जोखिम भएका क्षेत्रमा सतत निगरानी गर्नेछन्। यसले जनताको सुरक्षा सुनिश्चित गर्न र आपतकालीन अवस्थामा तत्काल उद्धार कार्य प्रारम्भ गर्न मद्दत पु¥याउनेछ।
जिल्लामा आकस्मिक स्वास्थ्य उपचार सेवालाई पनि निरन्तर सक्रिय राख्ने निर्णय भएको छ। स्वास्थ्य संस्था, अस्पताल र एम्बुलेन्स सेवाहरू तयारी अवस्थामा राखी, प्रभावित व्यक्तिहरूलाई छिटो स्वास्थ्य सहायता पुग्ने व्यवस्था मिलाइएको छ।
स्थानीय तहलाई सम्भावित बाढी, पहिरोकोजोखिम भएको क्षेत्रमा सुरक्षित स्थानमा स्थानान्तरण गराउने तयारी गर्न निर्देशन दिइएको छ । यस अन्तर्गत प्रभावित परिवारहरूको पूर्व सूचना लिइ, सुरक्षित स्थलमा समयमै सार्ने योजना बनाइएको छ । गाउँपालिका र नगरपालिका स्तरमा आपतकालीन उद्धार सामग्री, खाद्यान्न, पानी र प्राथमिक स्वास्थ्य सामग्री राख्ने व्यवस्था पनि गरिएको छ।
जिल्लामा सरोकारवाला निकायहरूले आपसी समन्वय र सहयोगलाई प्राथमिकतामा राख्ने बताएका छन्। रेडक्रस, मानवसेवा संस्था र स्थानीय स्वयंसेवी समूहहरू आपतकालीन राहत वितरण, स्वास्थ्य सहायता र जोखिमपूर्ण क्षेत्रमा निगरानीमा सहयोग गर्नेछन्। यसले समुदायलाई विपद्का समयमा थप आत्मनिर्भर बनाउने विश्वास व्यक्त गरिएको छ।

जल तथा मौसम विज्ञान विभागले आगामी दिनहरूमा भारी वर्षा हुने सम्भावना उच्च रहेको चेतावनी जारी गरेको छ। विभागका अनुसार उच्च भूभागमा अत्यधिक वर्षा र पहिरोको जोखिम बढ्ने भएकाले स्थानीय बासिन्दाहरूले सावधानी अपनाउनुपर्ने बताइएको छ। प्रशासन र सुरक्षा निकायको सक्रियता, स्वास्थ्य तयारी र स्थानीय तहको सहयोगले सिन्धुपाल्चोकमा सम्भावित विपद्को सामना गर्न सजिलो हुने देखिन्छ।
बैठकमा निर्णय भएका अन्य व्यवस्थाहरूमा सडक, पुल र सार्वजनिक संरचनाको निरीक्षण, विद्युत् र सञ्चार प्रणालीको पूर्व तयारी, र सुरक्षा सूचना प्रणाली मार्फत जनतालाई सचेत गराउने विषयहरू समावेश छन्। यसले आपतकालीन अवस्थामा जनतालाई प्रभावकारी सूचना पु–याउने र उद्धार कार्यलाई व्यवस्थित बनाउने उद्देश्य राख्दछ।
जिल्ला प्रशासन कार्यालयले सबै सरोकारवाला निकायलाई विपद् न्यूनीकरण र राहत–उद्धार कार्यमा सक्रिय रहन आह्वान गरेको छ। साथै, नागरिकलाई पनि आफ्नै घर वरिपरि जोखिम मूल्यांकन गरी सुरक्षित उपाय अपनाउन सचेत गराइएको छ।
यसरी, सिन्धुपाल्चोकमा आगामी दिनहरूमा भारी वर्षा र सम्भावित प्राकृतिक विपद् सम्बन्धी सबै तयारी पूर्ण रूपमा लागू भएको छ। प्रशासन, सुरक्षा निकाय, स्वास्थ्य संस्था र स्थानीय तहबीचको सहकार्यले जनताको सुरक्षा सुनिश्चित गर्ने मुख्य प्राथमिकता राखेको छ।