जनतापत्र, सिन्धुपाल्चोक |

सिन्धुपाल्चोकमा अन्तिम संस्कारका लागि घाटमा राखिएको एक शव आकस्मिक बाढीले बगेको छ। लामोसाँघुस्थित सिन्धु जलविद्युत् वितरण केन्द्रले पूर्वसूचना बिना ड्याम खोल्दा अन्त्येष्टि प्रक्रिया चलिरहेको बेला यो घटना भएको हो। त्रिपुरासुन्दरी गाउँपालिका–६ का वडाध्यक्ष रमेश बोहराका अनुसार बाल्का घाटमा मलामीहरूले दाउरा मिलाउँदै अन्तिम तयारी गर्दैथिए। त्यही क्रममा ड्यामको गेट अचानक खोलिएपछि खोला एकाएक बढेर चितासहित शव बगाएको हो। स्थानीय रत्नबहादुर बोहराको अन्त्येष्टिका लागि ठूलो संख्यामा स्थानीयवासी तथा मलामी घाटमा उपस्थित थिए। खोला एकाएक बग्न थालेपछि सबैजना ज्यान जोगाउन किनारातर्फ भाग्नुपरेको र त्यसक्रममा चिता र शव दुवै बगाएको स्थानीयले बताएका छन्।