जनतापत्र, सिन्धुपाल्चोक ।
मेलम्चीको मुहान स्थानीयहरूले बन्द गरेपछि पानी आपूर्तिमा समस्या देखिएपछि त्यसको समाधानका लागि आइतबार खानेपानी मन्त्रालयमा छलफल सुरु भएको छ। सिन्धुपाल्चोकको हेलम्बु क्षेत्रका स्थानीयवासीले मेलम्चीको मुहान बन्द गरेपछि काठमाडौंका विभिन्न क्षेत्रमा खानेपानी आपूर्ति ठप्प भएको हो। काठमाडौंमा आपूर्ति गरिँदै आएको मेलम्चीको पानी खोलामा फर्काइएपछि राजधानीमा पानी अभाव बढेको छ। मन्त्रालयमा भएको छलफलमा खानेपानी मन्त्रालयकी सचिव प्रमिलादेवी बज्राचार्य र मेलम्ची खानेपानी बाढीपीडित संघर्ष समितिका प्रतिनिधिहरूबीच प्रारम्भिक वार्ता भइरहेको समितिका अगुवा राजकुमार भण्डारीले जानकारी दिनुभयो। भण्डारीका अनुसार, २०८१ असोजमा तत्कालीन खानेपानीमन्त्री प्रदीप यादवको रोहबरमा भएको सम्झौता कार्यान्वयन नभएकाले स्थानीयहरूले सुरुङमार्फत पठाइएको पानी खोलामा फर्काएका हुन्। संघर्ष समितिका अध्यक्ष पासाङ शेर्पाका अनुसार, मेलम्ची र सहायक रिबर्मा खोला दुबैबाट पानी प्रवाह पूर्ण रूपमा बन्द गरिएको छ। दैनिक करिब २० करोड लिटर पानी आपूर्ति नहुँदा काठमाडौं उपत्यकाको वितरण प्रणालीमा ठूलो असर परेको छ। यसअघि संघर्ष समितिले काठमाडौंस्थित मेलम्ची खानेपानी आयोजनाको मुख्य कार्यालयमा तालाबन्दीसमेत गरेको थियो। माग सम्बोधन नभएपछि सातौँ दिनमा स्थानीयहरूले सुरुङको पानी खोलामा फर्काएका हुन्। खानेपानी आपूर्ति रोकिएसँगै काठमाडौं उपत्यका खानेपानी लिमिटेड ९केयूकेएल० ले हाल उपत्यकामा आन्तरिक स्रोतबाट मात्रै पानी वितरण भइरहेको जनाएको छ। सुन्दरीजल प्रशोधन केन्द्रबाट थोक वितरण केन्द्रमा पठाइने पानी आपूर्ति पूर्ण रूपमा बन्द भएको केयूकेएलले जनाएको छ।