आईसिँ तामाङ,चौतारा सिन्धुपाल्चोक ।
सिन्धुपाल्चोक जिल्लाको चौतारा अस्पतालमा अब स्याटेलाइट क्लिनिकमार्फत विशेषज्ञ सेवा उपलब्ध हुने भएको छ।
चौतारा अस्पतालमा आयोजित विशेष कार्यक्रममा राजधानीको शुक्रराज ट्रपिकल तथा सरुवा रोग अस्पताल, टेकुसँगको सहकार्यमा उक्त सेवा सुरु गर्ने सम्झौता सम्पन्न भएको हो।
कार्यक्रममा अस्पताल सञ्चालक समिति अध्यक्ष केशव राज गिरीको अध्यक्षता रहेको थियो भने टेकु अस्पतालका निर्देशक डा. युवानिधि बसौला प्रमुख अतिथिका रूपमा सहभागी थिए ।
अस्पतालका मेडिकल सुपरिटेन्डेन्ट डा. रुद्रमणि भण्डारी, समिति सदस्य ध्रुवलाल श्रेष्ठ, निमेश श्रेष्ठ लगायत टेकु अस्पतालका प्रतिनिधिहरुको उपस्थिति रहेको थियो।
सम्झौता अनुसार अबदेखि हरेक महिनाको दोस्रो र चौथो आइतवार, चौतारा अस्पतालमा बालरोग, जनरल मेडिसिन, छाला तथा यौन रोगका विशेषज्ञ सेवा नियमित रूपमा प्रदान गरिनेछ ।
यस सेवाबाट सिन्धुपाल्चोकका बासिन्दाले काठमाडौं जानु नपरीकै, आफ्नै जिल्लामै गुणस्तरीय उपचार सेवा पाउने अपेक्षा गरिएको छ ।