जनतापत्र,काठमाण्डौं ।

भदौ २४ गतेको जेनजी प्रदर्शनका क्रममा प्रहरीमाथि आक्रमण र हतियार लुटपाटमा संलग्न रहेको आरोप लागेका सिन्धुपाल्चोक जिल्लाको बलेफीका धिरज थापासहित तीन जनालाई धरौटीमा र एक जनालाई साधारण तारेखमा छोड्ने आदेश भएको छ। काठमाडौं जिल्ला अदालतका न्यायाधीश तेजबहादुर खड्काको इजलासले बलेफी गाउँपालिकाका धिरज थापालाई एक लाख रुपैयाँ धरौटीमा रिहा गर्न आदेश दिएको हो। त्यस्तै, दोलखाको शैलुङ गाउँपालिका–१ का गौतम घिसिङलाई दुई लाख रुपैयाँ, पाल्पा रम्भा गाउँपालिकाका विवेक बस्नेतलाई ५० हजार रुपैयाँ धरौटीमा रिहा गरिएको छ। साथै, नवीन राईलाई साधारण तारेखमा छोड्ने आदेश भएको अदालतका सूचना अधिकारी दीपककुमार श्रेष्ठले जानकारी दिनुभयो। बयानका क्रममा घिसिङले आन्दोलनकारीहरूका समूहसहित भीएस निकेतन कलेजको पाँचौँ तलामा पुगेका प्रहरीमाथि गालीगलौज, धम्की र कुटपिट भएको स्वीकार गरेका छन्। उनका अनुसार, प्रहरीले पोसाक खोलेर बागमतीमा हाम फाल्न बाध्य पारिएको थियो। घिसिङमाथि यसअघि पनि बैंकिङ कसुरका दुई मुद्दा दर्ता भएका थिए। प्रहरी वृत्त गौशालामा २०७९ असोज ४ र फागुन १० मा ती मुद्दा दर्ता भएका थिए।