आइसिँ तामाङ ।

पालभरि २०७२ सालको विनाशकारी भूकम्पको सम्झनामा मनाइँदै गरेको “भूकम्प स्मृति दिवस”कै दिन पुनः भूकम्पको धक्का महसुस गरिएको छ।

राष्ट्रिय भूकम्प मापन केन्द्रका अनुसार शनिबार बिहान ११ बजेर ५३ मिनेट जाँदा सिन्धुपाल्चोक जिल्लाको फुलपिङकोटलाई केन्द्रबिन्दु बनाएर ४.१ म्याग्नेच्युटको भूकम्प गएको हो। भूकम्पको धक्का सिन्धुपाल्चोकसँगै आसपासका जिल्लाहरूमा पनि अनुभूत गरिएको बताइएको छ। यद्यपि हालसम्म यस भूकम्पबाट जनधनको क्षतिको विवरण प्राप्त भइसकेको छैन।

यसअघि गएराति ७ बजेर ३४ मिनेटमा रुकुमपूर्वको रन्मामैकोट क्षेत्र केन्द्रबिन्दु भएको ४.२ म्याग्नेच्युटको अर्को भूकम्पसमेत मापन गरिएको थियो।

भूकम्प स्मृति दिवसकै दिन यस्ता कम्पनहरू महसुस हुनुले नागरिकमा २०७२ सालको भयावह भूकम्पको त्रास पुनः जगाएको छ। भूकम्पीय जोखिमयुक्त क्षेत्रका रुपमा चिनिने नेपालमा पछिल्ला केही दिनदेखि लगातार साना भूकम्पहरू गइरहेकाले विज्ञहरूले सतर्क रहन आग्रह गरेका छन्।