जनतापत्र, काठमाण्डौ |

नेपालको सार्वजनिक ऋण २७ खर्ब २९ अर्ब रुपैयाँ नाघेर कूल देशीय उत्पादन (जीडीपी) को करिब ४५ प्रतिशत पुगेको छ। सार्वजनिक ऋण व्यवस्थापन कार्यालयका अनुसार आन्तरिक ऋण १२ खर्ब ७५ अर्ब र बाह्य ऋण १४ खर्ब ५३ अर्ब रुपैयाँ भएको छ। गएको असारदेखि कात्तिकसम्म सार्वजनिक ऋणमा ५५ अर्ब ३६ करोड रुपैयाँले वृद्धि भएको उल्लेख छ। असारमा कुल सार्वजनिक ऋण २६ खर्ब ७४ अर्ब ४ करोड रुपैयाँ थियो। असोजको तुलनामा कात्तिकमा तिर्न बाँकी ऋण पनि बढेको देखिन्छ।

असोजसम्म बक्यौता सार्वजनिक ऋण २७ खर्ब २४ अर्ब ६५ करोड रुपैयाँ थियो भने कात्तिकसम्म त्यो थप बढेको कार्यालयले जनाएको छ। हाल आन्तरिक ऋण १२ खर्ब ७५ अर्ब ९६ करोड (जीडीपीको २०.८९ प्रतिशत) र बाह्य ऋण १४ खर्ब ५३ अर्ब ४५ करोड रुपैयाँ (जीडीपीको २३.८० प्रतिशत) पुगेको छ। गत चार महिनामा १ खर्ब ३८ अर्ब ७५ करोड रुपैयाँ ऋण प्राप्त हुँदा सोही अवधिमा १ खर्ब ५० अर्ब ८८ करोड रुपैयाँ ऋण भुक्तानी गरिएको कार्यालयले बताएको छ।