जनतापत्र, सिन्धुपाल्चोक

मेलम्ची नगरपालिका– नगर प्रमुख आइतमान तामाङले नगरपालिकाले सञ्चालन गरेका योजना तथा नीतिहरूलाई आवश्यकताको आधारमा परिमार्जन गर्न सकिने बताउनुभएको छ। आर्थिक वर्ष २०८१/०८२ को वार्षिक समीक्षा कार्यक्रममा बोल्दै उहाँले सबै सरोकारवालालाई योजना र कार्यक्रमहरूलाई प्रभावकारी, गुणस्तरीय र समयमै पूरा गर्न आग्रह गर्नुभयो।नगरप्रमुख तामाङका अनुसार समृद्ध र विकसित नगर निर्माणका लागि सबै पक्षको साझा प्रयास र एकताबद्ध सहयोग अपरिहार्य रहेको छ।

कार्यक्रममा उप–प्रमुख उमा प्रधानले नगरका योजना तथा कार्यक्रमहरूको अनुगमन प्रणालीलाई व्यवस्थित र सुदृढ ढंगले अघि बढाउने प्रतिबद्धता जनाउनुभयो। उहाँले नगरले सञ्चालन गर्ने गतिविधिहरू दीगो, नतिजामुखी र जनमुखी हुनुपर्नेमा जोड दिनुभयो। यस्तै, प्रमुख प्रशासकीय अधिकृत निमेष मिश्रले अघिल्लो आर्थिक वर्षमा नगरले सम्पन्न गरेका कार्यहरू, प्राप्त उपलब्धिहरू, देखिएका समस्या र सम्भावित समाधानका उपायहरूबारे विस्तृत प्रस्तुतीकरण गर्नुभयो।

वडा नं. २ का वडाध्यक्ष नगेन्द्र प्रसाद खतिवडाले वडास्तरमा भएका कार्य अनुभव साझा गर्दै सुधार गर्नुपर्ने क्षेत्रका सुझावहरू प्रस्तुत गर्नुभयो। कार्यक्रममा नगर क्षेत्रमा सक्रिय गैरसरकारी संस्थाहरूले पनि आफ्ना परियोजनाको प्रगति, उपलब्धि तथा आगामी योजनाबारे जानकारी प्रस्तुत गरेका थिए। समीक्षा कार्यक्रममा सहभागीहरूका अनुसार यस पहलले मेलम्ची नगरपालिकाको नीति, योजना र कार्यान्वयन प्रक्रियालाई अझ पारदर्शी, जिम्मेवार र प्रभावकारी बनाउन सहयोग पुग्ने विश्वास व्यक्त गरिएको छ।