जनतापत्र, सिन्धुपाल्चोक | चौतारा साँगाचोकगढी नगरपालिकामा वन डढेलो नियन्त्रण र सुरक्षासम्बन्धी निर्देशिका तयार गर्न आयोजित छलफल सोमबार सम्पन्न भएको छ। नगरपालिका र फरेष्टएक्सन नेपालको सहकार्यमा भएको कार्यक्रममा स्थानीय संरचना, डढेलोको जोखिम, तत्काल प्रतिकार्य क्षमता तथा सम्बन्धित निकायबीचको समन्वयबारे विस्तृत बहस गरिएको थियो।

कार्यक्रमको अध्यक्षता प्रमुख प्रशासकीय अधिकृत बैकुण्ठ प्रसाद सापकोटाले गरे भने नगर प्रमुख कृष्णप्रसाद सापकोटा प्रमुख अतिथिरूपमा सहभागी भएका थिए। छलफलमा उपप्रमुख, वडा अध्यक्षहरू, नेपाल आर्मी, नेपाल प्रहरी, सशस्त्र प्रहरी, हरितसेवक, डिभिजन वन कार्यालयका प्रतिनिधि तथा सामुदायिक वनका पदाधिकारीहरूको उल्लेखनीय उपस्थिति रहेकाले विषयमा बहुआयामिक सुझाव प्रस्तुत भएका थिए। सहभागीहरूले डढेलो नियन्त्रणमा देखिने मुख्य चुनौती, जोखिम बढी हुने क्षेत्र पहिचान, स्थानीय स्रोत–साधनको उपलब्धता, तथा प्रविधिको प्रभावकारी प्रयोगमार्फत प्रतिकार्य क्षमतामा वृद्धि ल्याउन सकिने उपायबारे आफ्ना विचार राखे। सुख्खा मौसम सुरु भइसकेकाले डढेलो सम्भावना बढेको उल्लेख गर्दै रोकथामलाई प्राथमिकतामा राख्नुपर्नेमा सबैको सहमति थियो। आवश्यक स्रोत तथा प्रोत्साहनको अभावले स्थानीय तहमा काम चुनौतीपूर्ण रहेको र विभिन्न निकायबीच समन्वय अझ सुदृढ हुनुपर्ने कुरा समेत उठाइयो।

कार्यक्रममा व्यक्तिगत तथा समूहगत सुरक्षा, स्थल व्यवस्थापन, कार्यसम्पादनका मापदण्ड, आकस्मिक तयारी, उद्धार प्रक्रिया, कानुनी–नैतिक दायित्व तथा वातावरणीय सुरक्षासम्बन्धी विषयहरूमा पनि विस्तृत छलफल गरिएको थियो। सहभागीहरूले उपलब्ध संरचना, जनशक्ति तथा प्रविधिको उचित प्रयोग बिना डढेलो नियन्त्रणको क्षमता अपेक्षित रूपमा बढ्न नसक्ने धारणा राखे। छलफलबाट प्राप्त सुझाव र अभिमतको आधारमा निर्देशिकाको अन्तिम रूपरेखा तयार गरी चाँडै कार्यान्वयनमा लैजाने प्रतिबद्धता नगरपालिकाले जनाएको छ। डढेलो जोखिम भएका क्षेत्रमा समुदाय, सुरक्षा निकाय र स्थानीय सरकारबीचको निरन्तर सहकार्य नै प्रभावकारी नियन्त्रणको आधार हुने भन्दै सहभागीहरूले संयुक्त प्रयास निरन्तर जारी राख्नुपर्ने आवश्यकता जोड दिए।