जनतापत्र,सिन्धुपाल्चेक ।
लैङ्गिक हिंसा विरुद्धको १६ दिने अभियानको पावन शुभारम्भ आज नोभेम्बर २५ ९मंसिर ९, २०८२० मा पाँचपोखरी थाङ्पाल गाउँपालिका, सिन्धुपाल्चोकमा दीप प्रज्वलनसहित सम्पन्न भएको छ । उज्यालो दीपशिखाले अन्धकार हटाएझैँ, हिंसा, विभेद र असमानताबाट मुक्त समाज निर्माण गर्ने सामूहिक प्रतिज्ञाको प्रतीक स्वरूप कार्यक्रम सुरु गरिएको हो। उद्घाटन गाउँपालिका उपाध्यक्ष श्रीमती सुनिता अधिकारीले आध्यात्मिक आस्था र सामाजिक उत्तरदायित्वको भावपूर्ण अभिव्यक्तिसहित गर्नुभयो।
कार्यक्रममा वडा नम्बर ६ का वडा अध्यक्ष तथा गाउँपालिका प्रवक्ता नारायण भट्टराई, गाउँपालिका तथा स्वास्थ्य संस्थामा कार्यरत कर्मचारी, महिला तथा बालबालिकाको क्षेत्रमा क्रियाशील संघ–संस्था प्रतिनिधि लगायतको सक्रिय उपस्थिति थियो। सहभागीहरूले गरिमा, सुरक्षा र सम्मानलाई सामाजिक जीवनको मूल मूल्यका रूपमा स्थापित गर्ने प्रतिबद्धता व्यक्त गर्नु भएको छ । महिला तथा बालबालिका शाखा प्रमुख दीपा कुमारी धमलाका अनुसार अभियानलाई जनमुखी र प्रभावकारी बनाउन सडक नाटक, विद्यालयस्तरीय वृत्तचित्र प्रदर्शनी, सीपमूलक तालिम, व्यक्तित्व तथा कला प्रतियोगिता लगायतका कार्यक्रम तय गरिएको छ। साथै वैदेशिक रोजगारीबाट फर्किएका दिदीबहिनीहरूसँग अन्तरक्रिया गरी उनीहरूको अनुभवलाई समाजमा उजागर गर्दै चेतना अभिवृद्धि गर्ने तयारी गरिएको छ।