जनतापत्र, सिन्धुपाल्चोक ।
नेपाल संवत ११४६, शुभ दीपावली २०८२ तथा छठ पर्वको पावन अवसरमा लायन्स क्लब अफ काठमाडौं डाँफेले विशेष देउसी–भैलो तथा विविध सांस्कृतिक कार्यक्रम आयोजना गरेको छ। समाजसेवी तथा सामाजिक अभियान्ता दिप खतिवडाका अनुसार, सामुदायिक विद्यालयहरूको शैक्षिक उत्थानका लागि सहयोग जुटाउने उद्देश्यले कार्यक्रम आयोजना गरिएको हो। यस कार्यक्रमले स्थानीय समुदायमा सहयोग र एकताको भावना अभिवृद्धि गर्ने अपेक्षा गरिएको छ। कार्यक्रममा देशका चर्चित राष्ट्रिय कलाकारहरूको उपस्थितिसहित आकर्षक सांस्कृतिक प्रस्तुति प्रस्तुत गरिने भएको छ।
सांस्कृतिक कार्यक्रममा कलाकार तथा लायन्स क्लब अफ डाँफेका अध्यक्ष भिमसेन खतिवडा, सुर्यमणी आचार्य, गिता सेन्चुरी, राधिका ढकाल, स्मृति गौतम, कुमार पौडेल, रेवन बिश्वकर्मा, गणेश भुसाल, बसन्त दंगाल, र बिष्णु तामाङका प्रस्तुति रहनेछन्। यस अवसरमा समाजसेवी दिप खतिवडाले सबैलाई उपस्थित भई नेपाली संस्कृतिको संरक्षण र सामुदायिक विद्यालयको उत्थानमा योगदान दिन हार्दिक निमन्त्रणा गरेका छन्।