जनतापत्र, सिन्धुपाल्चोक । नेकपा (एमाले) को ११औँ राष्ट्रिय महाधिवेशनका लागि सिन्धुपाल्चोकका दुवै प्रतिनिधि सभा क्षेत्रबाट महाधिवेशन प्रतिनिधिहरू औपचारिक रूपमा चयन भएका छन्। शनिबार बिहानबाट सुरू भएको मतदान राति अबेरसम्म चल्यो र मतगणना सकिएपछि खुला, महिला तथा युवा—तीनवटै कोटामा १५ जना प्रतिनिधि चयन भएको जिल्ला कमिटीले जनाएको छ। यसपटक एमालेले दुवै क्षेत्रमा प्रत्यक्ष निर्वाचनमार्फत प्रतिनिधि छान्दै संगठनलाई आन्तरिक रूपमा अझ व्यवस्थित बनाउने प्रयास गरेको देखिएको छ।
क्षेत्र नं.–१ , कमल नेपाल अग्रस्थानमा, महिलामा सुशीला पाख्रिनको उच्चतम मत
क्षेत्र नं.–१ बाट खुला कोटामा पाँच जना प्रतिनिधि चयन भएका छन्। लिसङ्खुपाखर गाउँपालिकाका पूर्व अध्यक्ष कमल नेपाल १,०६० मतसहित सबै उम्मेदवारभन्दा अघि रहँदै विजयी भए । लामो समयदेखि स्थानीय राजनीतिमा सक्रिय नेपाल यसअघि एमालेको जिल्ला नेतृत्वमा समेत काम गरिसकेका व्यक्ति हुन्।
उनीपछिको स्थानमा पूर्व वडाध्यक्ष दिलकुमार लामा ९३९ मतसहित रहे । तेस्रो स्थानमा होमनारायण श्रेष्ठ परे, जसले ९३२ मत प्राप्त गरे। श्रेष्ठ जुगल गाउँपालिकाका पूर्व अध्यक्ष, गाउँपालिका राष्ट्रिय महासंघका पूर्व अध्यक्ष र एमाले सिन्धुपाल्चोकका हालका अध्यक्ष समेत हुन्। खुलातर्फ अन्य दुई विजेतामा ९२२ मत ल्याएर प्रेम लामा तथा ९२१ मतसहित प्रदीप पौडेल परे ।
महिला प्रतिनिधि- तीन जनाले पाए बढी विश्वास
महिला कोटामा प्रतिस्पर्धा निकै रोचक बन्यो । तीनै जना पालिकाहरुका पुर्व उपप्रमुख र उपाध्यक्षहरु रहेका छन् । बाह्रबिसे नगरपालिकाकी पूर्व उपमेयर सुशीला पाख्रिन १,१४३ मत प्राप्त गर्दै महिलामात्र होइन, क्षेत्र–१ का सबै उम्मेदवारमध्ये सबैभन्दा धेरै मत ल्याउने नेताको रूपमा देखिइन् । दोस्रो स्थानमा भोटेकोसी गाउँपालिकाकी पूर्व उपाध्यक्ष दाबुटी शेर्पा ९२० मतसहित चयन भइन्। त्यस्तै बलेफी गाँउपालिकाका पुर्व उपाध्यक्ष कमला कायस्थ ८५३ मत ल्याउँदै तेस्रो प्रतिनिधिका रूपमा उठेकी छिन्।
युवा कोटा – आङदोर्जे शेर्पाको सहज जित
युवा कोटामा आङदोर्जे शेर्पा ९६१ मतसहित विजयी भएका छन् । क्षेत्र नं.–१ मा जम्मा २,०६३ मत खसेको थिया ।
क्षेत्र नं.–२ , कृष्णगोपाल तामाङ शीर्षस्थ, कडा प्रतिस्पर्धा
क्षेत्र नं.–२ को परिणाम पनि उत्तिकै चासोपूर्ण रह्यो। खुलातर्फ एमाले सिन्धुपाल्चोकका सचिव तथा पूर्व जिल्ला समन्वय समिति अध्यक्ष कृष्णगोपाल तामाङ १,११२ मत ल्याउँदै अग्रस्थानमा आए । माथिल्लो स्थानका उम्मेदवारबीच कडा प्रतिस्पर्धा देखियो।
टासी लामा १,१०३ मतसहित तामाङभन्दा केवल नौ मतले मात्र पछि परे । पाँचपोखरी थाङपाल गाउँपालिकाका अध्यक्ष लामा स्थानीय विकासका एजेण्डाका कारण पछिल्लो समय निकै लोकप्रिय बनेका छन्।
तेस्रो स्थानमा, एमाले सिन्धुपाल्चोकका पूर्व अध्यक्ष तथा २०७९ सालमा प्रदेशसभा उम्मेदवार रहेका हस्तबहादुर पण्डित १,०५२ मतसहित परे । चौथो स्थानमा मित्रलाल चौलागाईं ८९९ मत प्राप्त गर्दै प्रतिनिधिमा चयन भए ।
महिला कोटा – पराजुली र सापकोटा विजयी
महिला तर्फ सुनिता पराजुली १,००१ मतसहित पहिलो बनिन्। बालकुमारी सापकोटा ७८२ मतसहित दोस्रो स्थानमा परिन् । सापकोटा जिल्ला समन्वय समितिकी पूर्व उपप्रमुख हुन् ।
युवा कोटा- हिरा चौलागाईँको उदय
युवा कोटाबाट हिरा चौलागाईं ७३१ मतसहित विजयी भए । ४० वर्षमुनिका युवा नेताहरूलाई मौका दिनुपर्ने मागसँगै हिरा चौलागाईंको उम्मेदवारी दर्ता गराएका उन अनेरास्ववियुका पुर्व अध्यक्ष हुन् । क्षेत्र नं.–२ मा १,७४४ मत खसेको जिल्ला निर्वाचन समितिले सार्वजनिक गरेको छ।
यस अघि नै दलित प्रतिनीधि मधुरा विक निर्विरोध निर्वाचित वनेका थिए ।

एमालेको झण्डै ६० प्रतिशत मतदाता खोई ?
क्षेत्र नम्बर १ मा ५६६८ र क्षेत्र नम्बर २ मा ३७११ जना संगठित सदस्य रहेका थिए । यसरी दुवै क्षेत्रको जम्मा गर्दा ९,३७९ हुन्छ । तर मतदान प्रकृयामा ३,८०७ जनामात्र सहभागि भएका छन् । यसरी हेर्दा ४० दशमलव ५९ प्रतिशतले मात्र मत हालेको देखिन्छ । ५९ दशमलव ४१ प्रतिशतले मतदान प्रकृयामा समावेश भएन्न ।
गुटगत सन्तुलन – एक क्षेत्रमा ईश्वर, दुईमा ओली समूह अगाडी
यसपटकको एमाले आन्तरिक निर्वाचनमा गुटीय शक्ति–सन्तुलन स्पष्ट रूपमा देखिएको छ । क्षेत्र नं.–१ मा ईश्वर समूह निकट उम्मेदवारहरू प्रतिनिधिमा बढी निर्वाचित हुँदा, क्षेत्र नं.–२ मा अध्यक्ष केपी ओली समूह समर्थित नेताहरूले अग्रता लिए । समग्र हेर्दा केपि विरुद्ध सिन्धुपाल्चोक बलियो देखिएको छ ।