जनतापत्र, काठमाडौँ  — नेकपा माओवादी केन्द्रसहितको एकता प्रक्रियामा असहमति जनाएका विघटित नेकपा एकीकृत समाजवादीका नेतृ रामकुमारी झाँक्री र किसान श्रेष्ठलगायतका नेताहरू नेकपा एमालेमा प्रवेश गरेका छन्।

सोमबार काठमाडौंको राष्ट्रिय सभा गृहमा एमालेले आयोजना गरेको ‘घर फर्क अभियान राष्ट्रिय घोषणा सभा’ कार्यक्रममा उनीहरूलाई औपचारिक रूपमा एमालेमा स्वागत गरिएको हो।

कार्यक्रममा पार्टी अध्यक्ष केपी शर्मा ओलीले नयाँ प्रवेश गर्ने नेताहरूलाई पार्टीको झण्डा र खादामालासहित स्वागत गरे। सो अवसरमा झाँक्री र अन्य नेताहरूले अध्यक्ष ओलीलाई कलम हस्तान्तरण गर्दै प्रतीकात्मक रूपमा पार्टी प्रवेश गरेका थिए।

कार्यक्रममा केन्द्रीय सदस्यहरू गम्भीरलाल श्रेष्ठ, राजाराम स्याङ्तान, ध्रुव विष्ट, नवराज पौडेल, अर्जुन राई, अम्बिका राई लगायतका नेताहरू पनि एमालेमा समाहित भएका छन्।

यस्तै, अन्य नेताहरूमा केदार प्रसाद गौतम, डा. सावित्रिदेवी न्यौपाने, उत्तमदेवी श्रेष्ठ, केशव सापकोटा, शत्रुजङ्ग बस्नेत, सोमित राई, मणि दाहाल, विशाल क्षेत्री, उपेन्द्र थापा, जीवन मगर, सन्जिव भण्डारी, नरबहादुर श्रेष्ठ, बुद्ध श्रेष्ठ, टेकबहादुर श्रेष्ठ, सोमबहादुर श्रेष्ठ, हरिकृष्ण श्रेष्ठ, कृष्णगोपाल श्रेष्ठ, होमनाथ श्रेष्ठ, सरु मिश्र उप्रेति, सन्तोष कुसवाह, तेजप्रसाद नेपाल, हरिप्रसाद नेपाल, दावा शेर्पा, शमशेर शाक्य, प्रविण घर्तीमगर लगायत पनि पार्टीमा सामेल भएका छन्।

कार्यक्रममा सहभागी नेताहरूले एमालेमा फर्कनु आफ्नो राजनीतिक यात्राको स्वाभाविक निरन्तरता भएको बताएका छन्।