जनतापत्र, भोटेकोशी सिन्धुपाल्चोक ।
चीन व्यापारका लागि महत्वपूर्ण मानिने रसुवागढी नाका बाढी र पहिरोको लगातार असरमा परेपछि यातायात र व्यापार ठप्प भएको छ। भोटेकोशीमा आएको बाढीले चीनतर्फले राखेका ह्युमपाइप बगाएपछि बेलिब्रिज निर्माण अघि बढ्न सकेको छैन।
शनिबार बिहान टिमुरे–रसुवागढी सडकखण्डमा सुख्खा पहिरो खस्दा आवतजावत पूर्ण अवरुद्ध भएको हो। स्थानीयले आकस्मिक रूपमा भागदौड गर्नुपर्ने अवस्था आएको थियो। असारमा आएको भीषण बाढीले मितेरी पुल बगाएपछि अस्थायी पुल बनाउन सुरु गरिएको थियो तर बारम्बारको वर्षा र बाढीले संरचना भासिँदा काम अघि बढ्न नसकेको हो। चीनतर्फले बेलिब्रिजको फाउन्डेसन तयार गरे पनि नेपालतर्फ ल्याउनुपर्ने उपकरण र कामदारलाई भोटेकोशी पार गर्न नसक्दा पुल निर्माण अनिश्चित बनेको छ। वर्षा नरोइञ्जेल प्राविधिक रूपमा काम सुरु गर्न गाह्रो हुने सीमा सुरक्षाकर्मीहरूले जनाएका छन्।
रसुवा भन्सार अधिकृतका अनुसार भन्सार गतिविधि पूर्ण रूपमा रोकिएको छ। अहिले चीनसँगको व्यापार तातोपानी नाकातर्फ मोडिएको भए पनि त्यहाँ पनि सडक भासिँदा सहजता ल्याउन सकिएको छैन। सिन्धुपाल्चोक उद्योग वाणिज्य संघका अध्यक्ष बुद्धराज बस्नेतले सीमामा व्यावसायिक कन्टेनर अड्किएर सडक अवरोध हटाउन कठिन भएको बताउनु भएको छ ।
भोटेकोशीले तलबाट कटान गर्ने र माथिबाट पहिरो झर्ने भएकाले सडक निर्माण प्राविधिक रूपमा निकै चुनौतीपूर्ण बनेको समेत बताउनु भएको छ ।