जनतापत्र,काठमाडौं ।
लगातार तीन दिनदेखि वर्षा गराएको ‘मोन्था’ चक्रवात नेपालबाट बाहिरिएको छ। मौसम पूर्वानुमान महाशाखाका अनुसार आज देखिएको वर्षा भने पश्चिमी वायु र अरब सागरमा बनेको न्यून चापीय प्रणालीका कारण भएको हो। महाशाखाले आजको वर्षा बेलुकासम्म रोकिने र भोलिदेखि देशभर मौसम सामान्य रूपमा खुल्ने जनाएको छ। तर कोशी, बागमती र गण्डकी प्रदेशका पहाडी क्षेत्रमा भने भोलि पनि केही ठाउँमा हल्का वर्षा हुन सक्ने सम्भावना छ। पछिल्लो एक घण्टामा वागमती प्रदेशका पूर्वी भागका केही स्थानमा मात्र हल्का वर्षा भएको र अन्य ठाउँमा मौसम स्थिर बन्दै गएको महाशाखाले जनाएको छ। मौसमविद्हरूका अनुसार भोलिदेखि मङ्गलवारसम्म देशभरका किसानले धान भित्राउने काम सहजै गर्न सक्नेछन्। तर मङ्गलवार बेलुकादेखि अरब सागरबाट अर्को न्यून चापीय प्रणाली सक्रिय हुँदै पश्चिम नेपालमा बदली ल्याउने सम्भावना रहेको त्रिभुवन विश्वविद्यालयका सह–प्राध्यापक तथा मौसमविद् विनोद पोखरेलले जानकारी दिनुभयो। पोखरेलका अनुसार सो प्रणाली कमजोर भए पनि त्यसले पश्चिम नेपाल हुँदै काठमाडौंसम्म हल्का वर्षा गराउने अनुमान गरिएको छ। हिउँदयाममा नेपालमा प्रायः भू–मध्य सागर र अरब सागरमा विकसित न्यून चापीय प्रणालीको प्रभाव देखिने गर्छ, जबकि बङ्गालको खाडीको असर भने यो समयमा निकै कम हुने गर्दछ। मनसुन अवधिमा भने बङ्गालको खाडी हुँदै आउने वायु नेपालमा पानी पार्ने मुख्य स्रोत बन्दै आएको छ।