जनतापत्र, सिन्धुपाल्चोक ।
मेलम्ची खानेपानी आयोजनासम्म पुग्ने मुख्य पहुँच मार्गहरूलाई बहुवार्षिक योजना अन्तर्गत राखी तत्काल निर्माण अघि बढाउन माग गरिएको छ। नेकपा एमालेका स्थायी समिति सदस्य तथा पूर्वमन्त्री शेरबहादुर तामाङको नेतृत्वमा एक टोलीले मेलम्ची खानेपानी विकास समितिमा ध्यानाकर्षण पत्र बुझाउँदै सो माग अघि सारेको हो।
पानीपोखरीस्थित आयोजनाको कार्यालयमा आयोजित कार्यक्रममा सिन्धुपाल्चोक जिल्लाका विभिन्न क्षेत्रका अग्रज नेता तथा समाजसेवीहरूको उपस्थिति रहेको थियो। कार्यक्रममा बालकृष्ण देउजा, टासी लामा ह्योल्मो, हस्त पण्डित, कृष्ण गोपाल तामाङ, दावा लामा ह्योल्मो, निर्मल बन्जार र डोल्मा लामा लगायतको सहभागिता थियो।
कार्यक्रममा मेलम्ची–हेलम्बु सडक, मेलम्ची–थाङपालधाप–थाङपालकोट–भोताङ–लार्के खण्ड तथा फट्टे–दाउचेत–केउरानी–बाँसखर्क–बरुवा–बोल्गाउँ–याङ्री सडकखण्डको लागत संशोधन गरी बहुवार्षिक योजना बनाएर यथासिघ्र निर्माण कार्य सुरु गर्नुपर्नेमा जोड दिइएको थियो।
पूर्वमन्त्री तामाङले मेलम्ची आयोजनाबाट राजधानी काठमाडौंमा पानी पुगिसकेको भए पनि स्रोत क्षेत्रका स्थानीयवासीहरू अझैसम्म कमजोर सडक अवस्थाले समस्यामा परेको बताए। उनले सडक निर्माणका लागि चालु आर्थिक वर्षको बजेट अपुग भएकाले दीर्घकालीन दृष्टिले बहुवार्षिक योजना लागू गरेर अघि बढ्नुपर्ने धारणा व्यक्त गरे।
“मेलम्चीको पानीले राजधानीको तिर्खा मेटाएको छ, तर स्रोत क्षेत्रका नागरिकहरू वर्षौंदेखि आधारभूत पूर्वाधार अभावमा बस्न बाध्य छन्,” तामाङले भने, “यस असमानतालाई चाँडो अन्त्य गर्न सरोकारवाला निकायले ठोस निर्णय लिनुपर्छ।”
मेलम्ची खानेपानी विकास समितिका कार्यकारी निर्देशक रत्न लामिछानेले आवश्यक लागत संशोधनसहित बहुवार्षिक योजना तयार गर्ने प्रक्रिया अघि बढाइएको जानकारी गराए। साथै, स्रोत सुनिश्चितताको लागि आवश्यक सिफारिस पनि गरिने बताए।
स्थानीय पूर्वाधार निर्माणमा देखिएको ढिलाइले मेलम्ची खानेपानी आयोजनाको दीर्घकालीन प्रभावकारिता प्रभावित हुने भन्दै सरोकारवाला पक्षलाई चाँडो पहल गर्न आग्रह गरिएको छ। सहभागीहरूले मेलम्ची आयोजनाको मूल क्षेत्रमै विकासको गति सुस्त हुनु अस्वीकार्य भएको बताएका छन्।
ध्यानाकर्षण पत्र :
२१ श्रावण २०८२, मंगलवार ०७:४९
