जनतापत्र,मेलम्ची सिन्धुपाल्चोक ।

मेलम्ची नगरपालिका–११ मेलम्ची बजारमा हिजो राति अचानक भएको आगलागीले दुई वटा व्यवसायिक पसल जलेर नष्ट भएका छन्। दिनेश बस्नेतको घरको पहिलो तल्लामा रहेका दुई वटा सटरमध्ये रोशन सुनारले सञ्चालन गरेको धनलक्ष्मी सुन चाँदी पसल र दान बहादुर अधिकारीले सञ्चालन गरेको अधिकारी फेन्सी पसलमा करिब राति ८ बजे अचानक बिजुली सर्ट भएर आगो लागेको प्रहरीको भनाइ छ। घटनाको जानकारी पाएलगत्तै इलाका प्रहरी कार्यालय मेलम्चीबाट प्रहरी निरीक्षक शुकदेव पौडेलको कमाण्डमा ९ जनाको प्रहरी टोली घटनास्थल पुगेको थियो। स्थानीयवासीलगायत करिब ३०–३५ जनाको सहयोगमा राति ८ः३५ बजे आगो नियन्त्रणमा लिन सफल भएको प्रहरीले जनाएको छ। आगलागीबाट मानविय तथा चौपाय क्षति नभए पनि सम्पत्ति क्षतिको विवरण खुल्न बाँकी रहेको इलाका प्रहरी कार्यालय मेलम्चीले जनाएको छ