जनतापत्र, सिन्धुपाल्चोक

मेलम्ची नगरपालिकाका प्रमुख आइतमान तामाङले नगर क्षेत्रमा कुनै पनि विद्यार्थी आर्थिक कारणले शिक्षाबाट वञ्चित हुन नदिन नगरपालिका प्रतिबद्ध रहेको स्पष्ट पार्नुभएको छ। शिक्षा क्षेत्रमा नगरपालिका निरन्तर रूपमा लगानी गर्दै आएको उल्लेख गर्दै उहाँले सबैलाई समान अवसर उपलब्ध गराउने आफ्नो प्रतिवद्धता दोहोर्याउनुभयो।

इन्द्रेश्वरी माध्यमिक विद्यालयमा कक्षा ११ का नयाँ भर्ना भएका विद्यार्थीका लागि आयोजित स्वागत सभामा सम्बोधन गर्दै नगरप्रमुख तामाङले शिक्षालाई गम्भीरतापूर्वक लिएर परिश्रमपूर्वक अध्ययन गर्न विद्यार्थीहरुलाई आग्रह गर्नुभयो। उहाँले शिक्षक–गुरुका मार्गदर्शनलाई अनुसरण गर्नुपर्नेमा जोड दिँदै “भविष्यको आधार निर्माण यही उमेरमा हुन्छ,” भन्दै मिहिनेत र अनुशासनको महत्व सम्झाउनुभयो। नगरप्रमुखले शिक्षा, खेलकुद तथा सङ्गीतलगायत क्षेत्रमा पनि नगरपालिका साथ दिन तयार रहेको जानकारी दिनुभयो। कार्यक्रमकी विशेष अतिथि तथा मेलम्ची नगरपालिकाकी उपप्रमुख उमा प्रधानले विद्यार्थीको वास्तविक पहिचान अनुशासनले निर्धारण गर्ने बताउँदै अनुशासित भएर अघि बढ्न विद्यार्थीलाई अनुरोध गर्नुभयो। उहाँले यही विद्यालयमा अध्ययन गरेका धेरै विद्यार्थी आज जिम्मेवार पदमा पुगेको उदाहरण दिँदै सबैलाई आफ्नो लक्ष्यप्रति केन्द्रित हुन प्रेरित गर्नुभयो। वडा नं. ११ का पूर्व वडाध्यक्ष रुद्रप्रसाद दुलालले कक्षा ११ मा भर्ना भइ आएका विद्यार्थीलाई शुभकामना व्यक्त गर्दै उनीहरूको सफल भविष्यको कामना गर्नुभयो। विद्यालयका पूर्व प्रधानाध्यापक तथा इन्द्रावती बहुमुखी क्याम्पसका प्रमुख राधाकृष्ण श्रेष्ठले विद्यालयमा विज्ञान र प्राविधिक धारमा गुणस्तरीय शिक्षण भइरहेको बताउँदै आगामी दिनमा कानुन विषय थप गर्नु उपयुक्त हुने धारणा राख्नुभयो। कार्यक्रम विद्यालय व्यवस्थापन समितिका सदस्य छेसाङ तामाङको अध्यक्षतामा सम्पन्न भएको थियो। कार्यक्रममा विद्यार्थीहरूले विभिन्न प्रतिभा प्रस्तुत गर्दै स्वागत सत्रलाई आकर्षक बनाएका थिए।