जनतापत्र,मेलम्ची सिन्धुपाल्चोक ।
मेलम्ची नगरपालिका–६ मानेभन्याङस्थित श्री जागेश्वरी आधारभूत विद्यालयले आफ्नै परिसरमा नमुना किचेन गार्डेन निर्माण गरेको छ। असोज २ गते विद्यालयको अग्रसरतामा विद्यार्थी, शिक्षक, विव्यस तथा पिटिए प्रतिनिधिहरूको सहभागितामा मौसमी तरकारीका विभिन्न जातका बिरुवा रोपेर करेसाबारी तयार गरिएको हो। ३५ फिट लम्बाइ र २० फिट चौडाइमा बनेको फलामे टनेलमार्फत उत्पादन हुने तरकारीले विद्यालयमा अध्ययनरत करिब १३५ विद्यार्थी र शिक्षकलाई वर्षभरि पुग्नेछ। कार्यक्रममा विद्यार्थीलाई तरकारी रोप्ने, गोडमेल गर्ने र संरक्षण गर्ने तरिका फोकल शिक्षक तथा संयोजक लालबहादुर अर्यालले अभ्यासात्मक रूपमा सिकाएका थिए। चाइल्ड रेस्क्यु नेपाल र साझेदारी नेपालको सहयोगमा निर्माण गरिएको किचेन गार्डेनमा टनेल, बिउ–पल्बिउ, कृषि औजार र आवश्यक खर्चसहित नियमित प्राविधिक सहयोग उपलब्ध गराइने जानकारी साझेदारी नेपालका सल्लाहकार पुरुषोत्तम घोरासैनी र कार्यक्रम अधिकृत पुष्पा भण्डारीले दिएका छन्। प्रधानाध्यापक बलबहादुर तमाङका अनुसार विद्यालयमा तयार गरिएको करेसाबारीले विद्यार्थीलाई विशेषगरी दलित तथा जनजाति समुदायका बालबालिकालाई ताजा र अर्गानिक तरकारी खान सहयोग पु¥याउनेछ। यसले विद्यार्थीलाई विद्यालय आउन प्रेरित गर्ने र तयार खानेकुरा (जस्तै बिस्कुट, चाउचाउ) खाने बानी हटाउँदै लैजाने अपेक्षा गरिएको छ।